Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Mynbou
Gold Fields se onttrekking uit SA wink dalk ook

Die ommekeer by die South Deep-goudmyn wes van Johannesburg baan die weg vir Gold Fields om dié myn, sy laaste in Suid-Afrika, van die hand te sit.

Gold Fields se South Deep-goudmyn naby Johannesburg.

Ná meer as tien jaar van verliese het South Deep vanjaar ’n wins behaal. As die myn teen Februarie 2021 bewys het dat hy winsgewend kon bly, sal ’n finale besluit oor sy toekoms geneem word.

Gold Fields het South Deep in 2006 gekoop.

Die goudmyn is een van die diepste goudmyne ter wêreld en het die tweede grootste goudneerslag ter wêreld.

“Daar is nog baie werk wat gedoen moet word, en een swaeltjie maak nog geen somer nie,” het Nick Holland, uitvoerende hoof van Gold Fields, vandeesweek in ’n onderhoud met Bloomberg gesê.

“Om mense te laat glo dat dit kan werk, moet ons oor ’n lang tydperk ’n goeie prestasie toon.”

Ten spyte van die myn se potensiaal, vererger onder meer kragonderbrekings en beleidsonsekerheid die myn se probleme, sê Holland.

Gold Fields het Vrydag South Deep se produksiedoelwitte vir vanjaar en volgende jaar verhoog in wat sy vyfde omkeerplan vir die myn is sedert hy dit verkry het.

Die maatskappy verwag dat 5% tot 10% meer goud vanjaar gelewer gaan word as die aanvanklike raming van 193 000 onse in 2019.

Maar beleggers bly steeds skepties nadat die myn die afgelope dekade herhaaldelik sy doelwitte gemis het, sê Holland.

In Augustus 2018 het Gold Fields ’n groot herstrukturering by die myn bekend gemaak nadat hy ’n kontantuitvloei van sowat R750 miljoen in die 2018-boekjaar gehad het. Dit het meer as 1 000 poste geraak. Die vakbond Numsa het daarna met ’n staking begin wat tot ’n kontantuitvloei van nog R120 miljoen gelei het voordat die vakbond die afleggings aanvaar het, berig MiningMX.

AngloGold Ashanti, die wêreld se derde grootste goudprodusent, is sedert einde Oktober met die verkoop van sy laaste myn in Suid-Afrika ook besig om sy bande met die land te verbreek.

AngloGold sê die omsigtigheidsondersoeke deur die topbieërs vir sy Mponeng-goudmyn is afgehandel.

AngloGold se hoofnotering is op die JSE, maar sal nadat Mponeng verkoop is, waarskynlik sy notering na Londen of Toronto skuif.

Holland het aan Bloomberg bevestig dat ook Gold Fields dit oorweeg om sy primêre notering na die buiteland te skuif.

– Bloomberg, verwerk

Meer oor die South Deep-myn

Ontginning by South Deep, wes van Johannesburg, het in 1961 begin.

Die myn is die tweede grootste in die wêreld en ook die sewende diepste.

Sy diepste skagte is 2,995 km onder die grond.

Die myn, met een van die grootste goudneerslae ter wêreld, beskik ook oor ’n noemenswaardige uraanneerslag.

Meer oor:  Gold Fields  |  Nick Holland  |  Notering  |  Mynbou  |  Goudmyne
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.