Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Mynbou
Toekoms vir goudsektor ‘lyk donker’
Die Mponeng-goudmyn in Gauteng is die diepste myn in die wêreld. Foto: AngloGold Ashanti

Onsekerheid oor beleid, stygende insetkoste, probleme by Eskom, die gebrek aan behoorlike vervoerinfrastruktuur, arbeidsdispute, onwettige mynbedrywighede en dalende hulpbrongrade voorspel onheil vir die Suid-Afrikaanse mynbousektor.

Só waarsku PwC in sy jongste verslag oor die Suid-Afrikaanse mynbousektor wat Donderdag in Rosebank, Johannesburg, uitgereik is.

Die hulpbron wat waarskynlik die meeste hieronder gaan ly, is goud.

PwC sê gegewe die huidige markomstandighede en veranderinge in die sektor is dit onwaarskynlik dat die plaaslike goudsektor ooit weer die rol as grootste goudprodusent ter wêreld sal vervul.

PwC sê Suid-Afrika is vandag vir net sowat 4% van die wêreldgoudproduksie verantwoordelik.

“Hoewel daar nog beduidende hoeveelhede goudreserwes beskikbaar is in Suid-Afrika, is dit ver van bestaande skag-infrastruktuur af, daar is kommer oor veiligheid, en arbeids- en elektrisiteitskoste styg voortdurend.

“In die afwesigheid van beduidende tegnologiese deurbrake sal Suid-Afrika sukkel om wêreldwyd mededingend te bly met goudproduksie.”

mynbou

Goeie nuus

Hoewel die goudsektor die afgelope jaar swaar getrek het, het ander sektore wel beter gevaar.

Myne vir platinumgroepmetale (PGMe) asook ystererts en mangaan is die enigste hulpbronne wat luidens PwC se navorsing die afgelope 15 jaar hul produksie verbeter het.

Steenkool bly steeds die hulpbron wat die grootse inkomste vir die plaaslike mynboubedryf genereer. Dit het in die boekjaar tot einde Junie 28% van die inkomste uit mynbou verteenwoordig.

Die 26 grootste mynmaatskappye in Suid-Afrika het saam ’n inkomste van R529 miljard vir die jaar tot einde Junie getoon. Dit is 12% meer as die vorige jaar.

PwC sê die hoër internasionale mandjieprys vir PGMe het die afgelope jaar veral in die land se guns getel.

PwC gebruik die finansiële state wat die maatskappye publiseer om sy verslag mee saam te stel.

Die dividende van die mynmaatskappye wat in die studie ingesluit is het in die afgelope boekjaar met R11 miljard, oftewel 6%, gestyg teenoor ’n jaar tevore.

Saam het die maatskappye R27 miljard aan dividende betaal.

Die myne saam het wel waardeverminderings van R22 miljoen op hul state getoon. Dit is egter die helfte van wat dit die vorige jaar was.

Die markwaarde van die maatskappye het met 84% tot R884 miljard gestyg.

PwC sê ’n groot deel van dié groei is danksy die styging in die markwaarde van Anglo American Platinum.

Die optimalisering van dié maatskappy se portefeulje en die hoër prys van PGMe het sy markwaarde in net een jaar met R129 miljard tussen Junie 2018 en Junie 2019 laat styg. Dit het tussen Julie en Augustus 2019 met ’n verdere R25 miljard gestyg.

Die gemiddelde bedryfskoste in die mynbousektor het die afgelope jaar met 8% gestyg.

Meer oor:  Pwc  |  Goud  |  Mynboubedryf
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.