Hou maar dop: 80% van vroue doen dit. Hulle koop in groepe, al is dit net in groepe van twee - sy en 'n vriendin. Nou nie kruideniersware nie (daarvoor het sy 'n lysie), maar klere en ander mooigoed. Hulle stook mekaar op, moedig mekaar aan, gee ondersteuning. "Pas aan, pas aan! Jy gaan fantasties lyk daarin!" "Ooo, daai broek sit asof dit vir jou gemaak is." "Dis nét die top vir jou. Koop sommer twee, man." Nie mans nie. Mans koop alleen. Hulle beweeg in, koop, beweeg uit. Die kortste pad terug motor toe. En as die winkel
nie het wat hulle soek nie, gaan soek hulle dit elders of gaan huis toe. Mans staan nie nog rond om te kyk of daar nie iets anders te koop is nie.

Sy en haar vriendinne wel.