Ek kom uit die SCOPE-tydskrif-jare waar borste met sterretjies toegeplak is. Borste was verbode en foto's daarvan was pornografie. Groot was my skok toe ek Europa toe getrek het en agtergekom het hoe natuurlik die beeld van ‘n kaal vrou vir die Europeër is! Byna alle tydskrifte het foto's van bostuklose meisies gepubliseer en dit was asof vet vroue, maer vrou, oud en jonk, nie naastenby die komplekse gehad het wat ons Suid-Afrikaanse tieners oor ons borste gehad het nie.

Ek self het later bostukloos begin loop op die strand en by ons swembad. Geen man het hom vergaap aan my nie. Geen kind het gedink dis snaaks nie. Ek het saam met ons tuiniers sonder ‘n bostuk gras gesny en dit was die natuurlikste ding op aarde.

En soos ek begin aanvaar het dat dié leefstyl anders is en dat die mense anders dink, so het ek gedink die andersheid word voortgesit in die slaapkamer. Ek was so dom! Liberale seksuele versoeke het niks te doen met wat aanvaarbaar is in die gemeenskap nie. Dit is die een plek waar jy mag nee sê. Dit is hier waar jou liefde en wedersydse respek tot op sy uiterste getoets word.

Dit is dikwels daai eerste klein treetjie van onsekerheid wat ‘n mens laat instem om ‘n vreemde ding te aanvaar agter toe deure en wat later lei tot onuithoudbare situasies.

Die belangrikste ding wat jy as vrou of vriendin kan doen, is om die situasie van misbruik eerstens te herken. As beide van ons nie saamstem in die slaapkamer nie, is dit verkeerd. Jy is nie preuts as jy nie wil saamspeel nie!

Hier is nogal baie briewe van lesers wat kla oor hulle mans wat saam met hulle vriende by die rugby of die gholf drink en dan huis toe kom met onredelike versoeke waartoe vrouens instem om die vrede te bewaar. “Wat moet ons doen?” vra almal.

Ek weet nie. Ek is een van daai wat ingestem het in die begin...

* Wat sê julle? Lewer asb kommentaar hieronder.