Ek het al dikwels gewonder waarom sommige skrywers so min skryf. Neem nou maar Donna Tartt. Haar derde boek het nou onlangs verskyn. En dit na ‘n stilte van elf jaar. Waarom sou sy so lank gewag het, voordat sy The Goldfinch geskryf het? Was daar net geen inspirasie vir ‘n storie nie? Of was daar ‘n idee en het sy daaroor gebroei vir jare voordat die woorde vir haar helderheid gekry het? Dikwels maak ek vir myself ‘n storietjie op oor waarom ‘n skrywer so ‘n langpouse neem. Die fantasie daaroor maak dit vir my nog meer geheimsinnig, en dis amper asof ek verskillende scenario’s vir die skrywer skep. Wanneer ek eindelik die moeite doen om op te gaan lees wat die werklike rede vir die stilswye was, is ek amper teleurgesteld! Ek leef nog lekker in my eie kop met Donna Tartt en gaan nog ‘n rukkie wag voordat ek gaan nalees oor haar woord-vakansie. . .

Onthou om ons winkel op Kalahari.com te besoek om van die boeke te bestel.

The Goldfinch, Donna Tartt (Little Brown, R265)

Donna Tartt (bekend vir The Secret History en The Little Friend) se derde boek, en haar eerste boek in 11 jaar, het wêreldwyd opspraak gemaak. Haar skryfwerk is al selfs met die styl en karakter van Charles Dickens se verhale vergelyk.

'n Amerikaanse seun, Theo Decker, se lewe verander onherroeplik toe hy 'n bomontploffing in 'n kunsgalery in New York oorleef. Die verhaal speel af oor ongeveer 'n tydperk van 10 jaar daarna. 'n Vreemdeling en slagoffer van dié aanval gee vir Theo 'n ring en 'n geheimsinnige opdrag kort voordat hy sy laaste asem uitblaas. As gevolg van hierdie ontmoeting kruis Theo se pad met diè van Hobie, 'n antieke meubelhandelaar wat later 'n voog en vaderfiguur vir hom word, en met diè van 'n rooikopmeisie wat sy hart steel. Tydens Theo se grootwordjare bly hy vir 'n tydjie by ryk mense in New York, gaan woon vir 'n ruk by sy pa in Las Vegas en ontmoet vir Boris, saam met wie hy dwelms begin gebruik. Hy keer terug na New York waar hy studeer en Hobie se besigheid bestuur. Hy vind oneerlike maniere om Hobie se skuld af te betaal en die besigheid te red. Sy verlede haal hom egter in en in 'n desperate poging om sy gewete skoon te kry en rus vir sy siel, vertrek hy saam met Boris na Amsterdam op die aand van sy verlowingspartytjie. Hy moet vir eens en altyd dringende sake gaan afhandel.

Die titel van die boek verwys na die skildery van 'n voëltjie deur Carel Fabritius wat hy in die sewentiende eeu geskilder het. Theo worstel regdeur die boek met sy obsessie met dié skildery en sy skuldgevoelens daaroor. Dis 'n storie van 'n seun wat grootword, baie struikelblokke oorkom en leer om verantwoordelikheid vir sy dade te neem. Donna Tartt het met haar besonderse skryfkuns weereens haarself uitstekend van haar taak gekwyt om alledaagse gebeure en interaksies tussen mense op 'n boeiende manier te skryf. Alhoewel die gedetailleerde beskrywings van antieke meubels en kunswerke dalk nie almal se smaak is nie, lees hierdie amper-800-bladsy boek lekker en maklik. Beslis 'n moet vir alle boekwurms. – Danica Steyn

FOTO: verskaf FOTO: verskaf

Die skrywer, Esta Steyn (Tafelberg, R195)

’n Amerikaanse draaiboekskrywer, Arthur Addington, sukkel om die dood van sy vrou en kind te verwerk, en worstel as gevolg daarvan met skrywersblok. Annabella Bennett kry per toeval werk as Arthur se huishoudster ná ’n bevlieging om na sy tuisdorp te keer. Min weet hy dat sy ’n joernalis is en dat hy ’n geskiedenis met dié jong vrou het.

Ek het gedink die storie het baie potensiaal toe ek die flapteks gelees het, en was baie opgewonde om met dié boek te begin. En aan die begin kon ek Die skrywer nie neersit nie. Soos wat die storie verloop het, is ek egter bietjie teleurgestel, veral deur die tipe karakter wat Anabella is. Ek het iemand met meer oemf verwag. Maar dit neem egter nie weg van die manier waarop die boek geskryf is nie. Esta kry dit reg om die hede en verlede perfek met mekaar te verweef sonder om jou as leser deurmekaar te maak. Ek was ook meegevoer deur Anabella se herinneringe van grootword as ’n sendelingkind in Afrika, juis toe sy vir die eerste keer vir Arthur ontmoet het. – Liesl du Toit

FOTO: verskaf FOTO: verskaf

Burial rites, Hannah Kent (Picador, R210)

Hierdie boek is geskoei op die ware verhaal van Agnes Magnusdottir wat in 1829 die laaste vrou was om in Ysland ter dood veroordeel te word vir moord.

Vir die laaste paar maande voor haar teregstelling word Agnes gestuur om op ‘n plaas te woon en werk. Die plaasboer en sy gesin wil niks met hierdie moordenaar te doene hê nie, maar geleidelik soos hulle haar leer ken, kom hulle al hoe meer agter dat daar twee kante aan elke storie is. Deur die besoeke van Vader Tóti, die jong assistent-priester wat aangestel is om haar geestelik te begelei, leer die leser ook vir Agnes en haar storie ken.

Die debuutwerk is pragtig geskryf en bied ‘n interessante blik op die landelike lewe asook die regstelsel in Ysland gedurende die negentiende eeu.   - Retha Burger

FOTO: verskaf FOTO: verskaf

The House of Memories, Monica McInerney(Macmillan, R114,98)

Die kern van dié roerende verhaal is: “grief is selfish”. Rou laat ’n mens irrasioneel optree en verwyt. Die subtitel is: Sometimes the hardest lessons to learn are those that matter most.

Na ’n tragiese ongeluk vlug Ella O’Hanlon van Australië na Londen om weg te kom van haar hartseer en woede en van die mense wat sy vir die tragedie blameer: haar bedorwe suster Jess en man Aidan, vir wie sy baie lief is. In Londen bly sy by haar geliefde oom Lucas met sy deurmekaar, dog wonderlike huis vol herinneringe. Hy lei haar na vergifnis vir haar familie en die redding van haar huwelik.

Hoe Aiden, Ella se man en haar suster Jess hulle skuldgevoelens, hartseer en verlange hanteer, word in dagboekinskrywings, briewe en e-posse uitgebeeld.

Dit is ’n verhaal oor die diepste ellende en heling deur vergifnis. Boeiend en met deernis en insig geskryf.   -  Malene Breytenbach

FOTO: verskaf FOTO: verskaf

Stepping Out, Steven Boykey Sidley (Picador, R195)

Ek het met groot entoesiasme gewag op die tweede boek van Steven Boykey Sidley, aangesien ek die eerste roamn, Entanglement, nog steeds onder my gunsteling boeke tel.

Die omslag beeld die silhoeët uit van ‘n man wat uit ‘n donker kamer stap na ‘n deur wat na ‘n ander kant lei – een wat ligter, meer aanloklik is. Net so is dit met Harold Cummings, wat aangetrek word na ‘n ander meer aanloklike wêreld. Ironies lei dit hom eerder na ‘n donker plek van misdaad en die onderwêreld van prostitusie en dwelms. Soos in die eerste boek  is dit ‘n samevloei van gebeurtenisse wat die hoofkarakter uiteindelik lei na die skadukant van die samelewing.

Harry is ‘n middelslag gesinsman – ‘n suksesvolle meganiese ingenieur wat in die oë van sy vriende alles het wat ‘n mens kan begeer. Dis egter die dood van sy kindervriend en die vertrek van sy vrou na haar siek suster wat hom sy eerste tree laat loop, weg van sy betaamlike middelklas bestaan, in die rigting van die gevaarlike - die begeerlike ongekende. Met elke tree voel Harry meer selfverseker en met elke tree verdwyn sy middelklas verse een vir een.

 Stepping out kan beskryf word as ‘n verhaal wat handel oor die terugverlang na ‘n gelukkiger jeug en die begeerte om iets agter te laat. Ook oor ‘n man wat homself wil sien as iemand wat voluit gelewe het. Of miskien net die wonder wat die lewe is, verdien het. – Pieter Hugo

FOTO: verskaf FOTO: verskaf

The Family Fang, Kevin Wilson (Picador, R292)

Die egpaar Fang is sieklik behep met hulle eie (en hoogs ontstellende) interpretasie van ware kuns. As eksperimentele kunstenaars ontsien hulle niks en niemand in die najaag van hul obsessie nie; hulle put perverse genot daaruit om die reaksies van ’n niksvermoedende publiek op kasset en film vas te lê. Toe Camille swanger raak, besluit sy en Caleb sonder enige sielewroeging om die kinders van kleins af by hulle bisarre produksies te betrek, en só ontaard Annie en Buster se kinderjare in ’n skrynende uitbeelding van die mees onrusbarende en moreel gewaagde tonele.

Later word Annie ’n aktrise en bekwaam Buster hom as joernalis. Na ’n fiasko op stel en ’n ongeluk tydens ’n onderhoud, keer hulle terug na hul ouerhuis in Tennessee. Daar is dinge egter glad nie pluis nie; pas na sus en boet se aankoms, verdwyn Caleb en Camille onder verdagte omstandighede. Annie en Buster is daarvan oortuig dat dit hul ouers se swanesang is, maar dan maak die polisie ’n grusame ontdekking. Is dit die senior Fangs se magnum opus, of is dit moord?

Wilson ondersoek die gekose fasette van kreatiwiteit met ’n donker sin vir humor; ’n knap skrywer is hy gewis, maar hierdie ontstemmende verhaal sal beslis nie in almal se smaak val nie. – Emsie Viljoen

FOTO: verskaf FOTO: verskaf

Open city, Teju Cole (Faber and Faber, R124)

Julius is ’n jong Nigeriese psigiater in New York City, wat in ’n soort van meditatiewe joernaalskrywing sy wydlopende indrukke gee van die stad en sy mense. Dit is veral ’n besinning oor identiteit, want “others are not like us”. Sy gevoel dat solidariteit gebaseer is op uiterlikes, dat alle swart Amerikaners outomaties ’n soort van broederskap deel, word uiteindelik wreed ontnugter.

Die boek is ryk aan intertekstualiteit, meer essay as verhaal – “without dialogue or plot, but very effective” (p.200) – en wandel saam met die hoofkarakter deur oorloë, geskiedenis, godsdiens en politiek, asook sy eie ongewone kindertyd in Nigerië. – Ilse van Staden

FOTO: verskaf FOTO: verskaf

Sense and Sensibility, Joanna Trollope (Harper Collins, R240)

As ’n groot aanhanger van Jane Austen se werk, het ek groot geskrik toe ek die eerste keer van die Austen Project, waar moderne skrywers gevra word om dié skrywer se boeke oor te skryf. Hoe kan jy moontlik Jane Austen se klassieke werk oorskryf, en dit boonop in ’n moderne weergawe? Maar Joanna Trollope se moderne weergawe van Sense and Sensibility het my aangenaam verras.

Dié verhaal oor twee susters, een die klassieke regterbrein-denker en die ander met ’n linkerbrein, en hul soeke na liefde en geluk, word vertel in ’n moderne wêreld waar selfone, luukse voertuie en sosiale media aan die orde van die dag is.

Tog bly Jane se klassieke liefdesverhaal behoue: Elinor Dashwood is logies, terwyl haar suster Marianne passievol en impulsief is. Wanneer hul pa sterf en hul halfbroer se vrou hulle – saam met hul ma en kleinsus – uit die huis gooi, moet hulle toevlug uit ’n ander oord kry. Dit vertel die verhaal van jong harte, eerste liefde en die sterk band en liefde wat net tussen susters kan bestaan.

Ek was mal oor die oorspronklike én die nuwe Sense and Sensibility. Boonop voel die moderne weergawe vir my na ’n totale nuwe boek wat my met nostalgie herinner aan Jane Austen se werk. Ek kan nie wag om die volgende boek in die Austen Project in die hande te kry nie!     -Elmari de Vos

FOTO: verskaf FOTO: verskaf

The shaking woman or a history of my nerves,  Siri Hustvedt (St Martin's Press, R198,58) ‘n Moet-lees nie-fiksieboek wat Hustvedt se eie hewige reaksie op haar pa se dood ondersoek. Hoewel sy ‘n ervare spreker is, het Hustvedt op ‘n dag onverklaarbaar begin rittel en beef toe sy voor ‘n gehoor oor hom praat. So erg dat sy kwalik regop kon bly, en dis die toestand waaroor sy nalees en wat sy in gewone taal probeer verklaar.

Sy bespreek die geskiedenis van die sielkunde, met klem op die behandeling van vroue. Haar probleem is ingewikkeld, want sy het geen slegte herinnerings aan haar pa nie, en is trouens baie trots op hom. Haar probleem is dalk verwant aan haar empatiese geaardheid en diep sensitiwiteit. Geen geraamtes kletter uit ‘n kas in die loop van die boek nie.

Eerlike persoonlike vertellings en terloopse verduidelikings maak die boek veel meer as net nog ‘n selfhelpgids oor populêre sielkunde.

Hustvedt is getroud met die skrywer Paul Auster en woon in New York. – Mariette Postma

FOTO: verskaf FOTO: verskaf

The Impact of our Actions, Kedibone Mooi (Reach Publishers, R189)

Dié lekkerlees-vertellings oor vroue sal ’n lag of ’n traan wek by elke vrou wat ek ken. Die name van hoofstukke soos “The Mistress”, “The Mother-in-law: Get a Life!” en “The Worshipper” sê sommer klaar g’n argetipe bly hier ongeskonde nie!

Die boek wil lesers sover te kry om introspeksie te hou oor die gevolge van hul dade. Die onderwerp kan maklik ’n vervelige, prekerige selfhelpboek oplewer, maar dit gebeur nie hier nie. As die Mistress verduidelik hoekom dit haar pas om ’n affair met ’n getroude man te hê, wil jy haar oë uitkrap – maar tog, tog wil jy haar ook van haarself red, saam met haar groepie vriendinne wat haar relaas geskok aanhoor.

Elke karakter is volrond mens, geskilder teen ’n agtergrond van kultuur, familie en vriendskappe. En dís wat maak dat jy nie die boek kan neersit nie. Bestel aanlyn by Kalahari.com – Anine Capraro