"Ons wil die Camino stap. In SARIE lees ons Wendy Maartens was daar. Ons stuur vir haar e-pos, sy laat weet ’n kampstofie is ’n moet. Maar . . . ons stofie se gassilinder mag nie op die vliegtuig nie. Geen probleem, daar’s ’n sportwinkel in St. Jean. Vrydag begin ons sesuur die oggend stap. Probleem: Winkels maak eers tienuur oop. Nat en verkluim kom ons ná 30 km in Roncesvalles aan. My lewensmaat, Alex, vra dadelik: ‘Where can we buy gas?’ ‘Next town,’ sê die herbergier. Saterdag, ná 25 km, vra ons wéér. Net om te hoor: ‘No, next town.’ Sondag gaan staan ons op ’n bruggie en Alex sê: ‘Bid jy nou vir ons, vir ons mense tuis én vra sommer vir gas.’ Ek bid: ‘Asseblief, Here, ons kry koud, help ons met gas!’ 50 m verder steek Alex vas: ‘Ek glo dit nie!’ Op ’n paal staan 2 gasbotteltjies . . . Ons het op dié stap besef: Om te bid gee gas

Sonja van Niekerk - Oudshoorn