Kobus oor Balie

“Ek en Isak Stephanus de Villiers Swart – ja, dis Balie se regte naam – was van standerd ses (graad agt) af saam in die koshuis in Paarl-Gimnasium, so ons ken mekaar goed. Ons het almal daar byname gehad; myne was Wiese. Een van ons skoolmaats, so ’n rooikop, se bynaam was Bloedwurm. Toe noem hulle sy boetie Lintwurm, sy sussie Sywurm en sy klein boetie Erdwurm. Balie is ’n absolute perfeksionis, só erg dat hy byna ’n pyn in die agterent is. Eintlik is hy kompulsief netjies. Sy hare was altyd mooi gekam.

In sy klerekas was sy wit sokkies en sy swart sokkies bymekaar, en sy T-hemde het met ’n perfekte hoek gelê. Hy’t hom vererg as ons op sy bed gesit of in sy kas gekrap het. Hy is ’n regte goody two-shoes en het seker maar swaar gekry met ons klomp saam met hom in die kamer. Maar Balie is ’n goeie mens en ’n lewenslange vriend.”

Balie oor Kobus

“Kobus het voor elke wedstryd sy hare laat sny – seker om aantreklik te probeer lyk. Ons het hom altyd daaroor gespot. Hy dra ook net ’n kortbroek op die rugbyveld, verder dra hy langbroeke. Hy is versot op rooiwyn en is dodelik allergies vir sesamsaadolie. Op die 1993-toer na Nieu-Seeland en Australië het hy van die olie ingekry en hy was byna dood.”

Moenie die Oktober-uitgawe van SARIE misloop nie, die Rugby Wêreldbekerspan verklap allerhande geheime oor mekaar!