Riaan Cruywagen, nuusleser, en Riana, tuisteskepper

"Ons troue, op Saterdag, 24 Julie 1971 in die Gereformeerde Kerk Randburg, was vir my ouers 'n emosionele belewenis. Riana is in my suster Christien se trourok getroud. Christien is in September 1969 'n week voor haar troue in 'n motorongeluk dood. Sy was net 21. Die onthaal was by die Leeukop-gevangenis en daar was sowat 450 gaste.

"Stel jou voor wat dit vandag sou kos! Ons het presies 'n week later na Nederland vertrek waar ek as omroeper by die destydse Afrikaanse Diens van Radio Nederland Wêreldomroep gaan werk het. Dit was 'n drie jaar lange wittebrood waartydens ons Europa platgery het."