Die wêreld weet dit nou! Top BBC sokker-analis en voormalige Liverspool-sokkerspeler, Alan Hansen, het op IOL gesê dat SA se Wêreldbeker-sokkertoernooi in vergelyking met al die groot toernooie wat hy al bygewoon het beslis uitstaan.

In 'n rubriek vir die BBC skryf Hansen dat dit wat op die veld gebeur het effens teleurstellend was, maar dat die beste ding van die wêreldbeker die atmosfeer in Suid-Afrika self is.

"Die organisering was puik en plaaslike aanhangers was steeds ongelooflik, selfs ná Suid-Afrika uit die wêreldbeker geskakel is," het Hansen gesê.

"Die Suid-Afrikaanse mense het nie net die meeste van hul Wêreldbeker gemaak nie, hulle het dit verhef, en daarom moet dit in die geskiedenisboeke opgeskryf word as een van die bestes nóg."