Daar is meer onder die borrels van TV-sepies as wat jy dink. Hulle vermaak nie net nie, maar leer ons ook lewenslesse.

Hoe gemaak met sepies en jou kind?

Ouers behoort saam met hul kinders televisie te kyk, glo Nadia van der Merwe van die Universiteit van Johannesburg.

En as 'n sosiale kwessie soos verslawing uitgebeeld word, moet jy dit met jou kind bespreek. As Paula (Diaan Lawrenson) in 7de Laan sê sy het gewerk terwyl sy eintlik by die spa was, vra jou kind of dit reg is en wat sal gebeur as Paula uitgevang word.

Oor Paula se leuens sê Danie Odendaal van 7de Laan: "Sy is 'n komiese karakter. Sy jok nie om iemand te na te kom nie. Boonop waarsku Aggie haar gereeld dat sy nooit in die hemel gaan kom nie."

Kaapse opvoedkundige sielkundige Lize van der Merwe sê kinders jonger as 12 behoort glad nie sepies te kyk nie. "Hul waardes is nog onontwikkel en hulle is beïnvloedbaar. As hulle daagliks leuens, buite-egtelike verhoudings en diefstal sien, kan hulle daardie waardes hul eie maak."

Lize sê sy kan in elk geval nie die nut daarvan insien om vir 'n sesjarige te verduidelik dat 'n volwassene nou op TV selfmoord gepleeg het nie."Pleks van saam met hulle sepies te kyk, gee eerder gehaltetyd aan jou kleiner kinders."

* Lees die volle artikel in die Januarie 2010-uitgawe van SARIE, vanaf 7 Desember te koop.

Wat dink jy?

Vertel ons in die kommentaarboks hieronder wat jy van sepies dink.