"Ek's nou nie die Engel Gabriël se bloedsustertjie nie en kleintyd was dit 'n stryd om my in die Sondagskoolklas te kry, maar vandag neem ek geen besluit sonder dat ek die Here in die saak ken nie. Ek praat met Hom soos ek nou met jou praat. My ma is die groot gelowige een. Dis deur haar geloof en gebed dat ek hier is. In my ouerhuis het ek net liefde geken, my beker loop oor. Daarom is ek so 'n mense-mens.

"Waar ek 20 jaar gelede wou verwurg, vergewe en bid ek vandag. En jy moet die waarheid liefhê. Die Here verskyn aan jou in hondjies, voëltjies, en bergies, 'n mens weet nooit. Jy kan een mens help, en jy help 'n nasie." - Shaleen Surtie-Richards oor spiritualiteit