Om nie eens van al die boeke wat oor mense geskryf is, te praat nie. Wat maak dat ek iets wil lees? Soms is dit ‘n opskrif wat my oog vang. Ander kere ‘n foto. En dan weer ‘n frase, soos "Do you ever really forget your first heartbreak?". Ek wil onmiddellik weet waaroor dit gaan en ek is nie alleen in hierdie nuuskierigheid nie. Hierdie week het ek ‘n klompie boeke uitgesoek oor mense. Oor party se lewens en die dinge wat oor hulle pad kom, kan jy net jou hande saam slaan en dankbaar wees dis nie jou lot nie. Dan is daar die lewenslesse wat jy leer uit hulle ervarings, sonder dat jy self deur van die gebeure hoef te worstel. Dit is die rede waarom ek altyd sal bly lees - en natuurlik om my nuuskierigheid te bevredig!

Onthou om ons elektroniese boekwinkel te besoek om van die boeke teen afslagpryse te koop.

The Last Song, Nicholas Sparks (Sphere, R190)

‘n Boeiende verhaal oor ‘n tipiese hedendaagse gesin - ma en pa geskei, moeilike tiener dogter en kleinboetie met heldeverering vir pa. Dis glad nie ‘n nuwe tema waaroor Sparks skryf nie en daar is al baie verhale oor hierdie presiese tema vertel. Wat die boek anders maak, is dat Sparks die vermoë het om elkeen van die karakters se diepste wesens bloot te lê op so manier dat jy nie anders kan as om ingetrek te word deur die gesinsdrama nie. Jy word deel van Ronnie se opstandigheid en woede teenoor haar ouers, ten spyte van haar diepliggende liefde vir hulle. Ronnie se ma besluit die kinders moet ‘n hele somer by hulle pa gaan spandeer, sodat sy haar verhouding met haar toekomstige man en hulle lewe saam uitgesorteer kan kry. Die sewentienjarige Ronnie is glad nie ingenome hiermee nie, want haar pa woon in ‘n klein kusdorpie ver van New York, waar haar vriende is. Die grinterigheid in die verhouding tussen Ronnie en haar pa is van die begin af daar, totdat ‘n hele paar dinge gebeur wat haar haar liefde en respek vir haar pa weer laat ontdek. En dat vergifnis ‘n belangrike rol in mens se lewe speel. Dis ‘n eg menslike verhaal wat jou laat wipkarretjie ry tussen die emosies en raak ‘n klomp kwessies aan wat deel van ons bestaan vorm - liefde, vertroue, medemenslikheid en vergifnis.

For the love of a son, Jean Sasson (Doubleday, R215)

‘n Skrikwekkende boek vir enige vrou. Hoe gaan jy aan met jou lewe as jou eks man jou seun steel en hom boonop teen jou draai? Dis presies waaroor hierdie boek gaan, die ware verhaal van ‘n Afghaanse vrou Maryam Khail. Die basis waarop die lot van vroue in dié land rus, is dat hulle as tweedeklas burgers gesien word. Daar is dit net mans wat enige aansien het en wat in alle opsigte bevoordeel word - of dit nou opvoeding of werkgeleenthede behels. Maryam het as kind gesien hoe sleg haar vroulike gesinsgenote behandel word (buite gesinsverband) en gerebelleer teen die feit dat sy ‘n meisie is. Sy het haarself voorgedoen as ‘n seuntjie, sodat sy beter behandel kon word op skool, tot die dag wat sy ontmasker is en terug gewerp is na die tweedeklas bestaan van meisies. Haar lewe stoom voort, tussen die politieke veranderinge in die land en die lot van haar gesin. Hulle kry dit reg om te ontsnap uit Afghanistan en ‘n nuwe lewe in Amerika te begin. Helaas, haar pa plaas soveel druk op haar om met ‘n man wat hy uitgekies het te trou en, omdat dit haar kultuur is, laat sy haarself dit begaan. Tot haar bittere spyt is sy vasgevang in ‘n huwelik waarin sy vreesbevange is. Haar man ontvoer haar kind en vlug met hom na sy tuisland, waar Maryam geen aanspraak op haar seun kan maak nie. Wat die uiteinde van haar lewe is, sal julle self moet verder lees in die boek. Dis onmoontlik om jouself te kan in dink hoe dit vir haar moet wees - ‘n amper onmenslike en onwerklike verhaal wat jou van begin tot einde laat voort lees om te sien waarheen Maryam se lewe oppad is en of sy darem iewers in haar lewe geluk gaan smaak.

 Don Quijote, deur Miguel de Cervantes - vertaal deur André P Brink (Human & Rousseau, R195)

Brink het sy vertaling uit die Spaans van Miguel de Cervantes se Don Quijote tot een-derde van die oorspronklike lengte ingekort. Dit is reeds in 1966 deur Human & Rousseau gepubliseer, maar die eerste sagtebanduitgawe het in 2010 verskyn. Brink noem dit "oneindig meer" as 'n blote verhaal. Wat oorspronklik 'n satire op die ou ridderromans was, het 'n volledige uitbeelding van die menslike toestand in al sy fasette geword. Die verhaal van die dolende ridder Don Quijote de la Mancha op sy ou "knol" van 'n perd, Rocinante, sy komieklike, simpatieke agterryer, Sancho Panza, en die sogenaamde ridder se skone beminde wat hy Dulcinea del Toboso doop, verruk opnuut. Hierdie is 'n pragtige uitgawe, ryklik geïllustreer, in die keurigste Afrikaans.

- Malene Breytenbach Me and Kaminski, Daniel Kehlmann, vertaal deur Carol Brown Janeway (Quercus, R129,95)

Sebastian Zöllner se mislukking as joernalis en kunskritikus word slegs deur die teleurstellings in sy lewe geëwenaar; volgens hom is sy kollegas jaloers op sy skryftalent, en boonop skat sy vriendin hom geensins na waarde nie.

In 'n poging om homself te bewys, besluit die egosentriese Zöllner om Manuel Kaminski ('n sterwende skilder van beperkte faam) se biografie te skryf en sit af na 'n dorpie in die berge, waar hy hoop om die kluisenaar op te spoor. Daar gekom, maak Zöllner 'n oorlas van homself: in sy soeke na inligting oor die skilder se duistere verlede, wurm hy hom by Kaminski se dogter in en verpes ou vriende van haar pa. Uiteindelik koop hy die huishoudster om en ontdek só 'n kelder vol ongetekende skilderye, asook 'n paar persoonlike dokumente en 'n toegesluite briewetas.

'n Leesbare roman wat selfsug, die soeke na identiteit en die aard van herinnering verken.

- Emsie Viljoen The Appointment, Herta Müller (Portobello Books, R139,95)

'n Nobelpryswenner se werk word krities beskou, maar 'The Appointment' stel glad nie teleur nie. Müller se gestroopte skryfstyl wat baie lekker lees, gryp die aandag vas en haar vertelling van 'n ontmenslikte lewe onder Ceausescu se vervolgingsbehepte totalitêre regime ontstel, maar skep dankbaarheid vir 'n eie saai lewe.

Haar vrees vir Albu, die ondervrager wat haar seksueel teister voor elke sessie word gekontrasteer met gedagtes aan Paul. Haar minnaar is selde nugter, maar sy onthou hulle ontmoeting by die mark nostalgies, hoe hy haar bygestaan het toe sy haar trouring wou verkoop. Dan maak sy 'n fout en vergeet om betyds van die trem af te klim... - Mariette Postma