Sting het oor “Roxanne” gesing, Leonard Cohen het ’n lied vir “Suzanne” geskryf, Smokey het langs “Alice” gebly, Simon & Garfunkel het verlief geraak op “Cecilia” en “Rosanna” het vir Toto geïnspireer. Vyf vroue “Cleopatra”, “Ophelia”, “Angela”, “Gloria” en “Donna” het by The Lumineers kom spook.  Ja, oor die jare was verskeie vroue se name in liedjies verewig.

In Afrikaans het kunstenaars ook al oor vroue gesing. 

Simone

Die liedjieskrywer Anton Goosen het in 1981 die liedjie “Brief vir Simone” neergepen. Het Simone toe ooit teruggeskryf?

Lisa

In 1986 het Koos Kombuis een van sy bekendste liedjies neergepen “Lisa se Klavier”. Dans Lisa se vingers steeds op haar klavier se klawers?

Melanie

Die Afrikaanse sanger Jay het in 2010 ’n sokkie-treffer geskryf “Melanie”. Die aktrise Donnalee Roberts het die rol van Melanie in sy musiekvideo vertolk.

Leja

In 2009 het die rockgroep Die Heuwels Fantasties  die lied “Leja” gesing. Het Leja ooit met haar liefde herenig?

Nonna

In 2019 het Appel die liedjie “Nonna” vrygestel, oor die vrygees-meisie wat die wêreld vol reis. Die aktrise Mila Guy het die Nonna in sy musiekvideo gespeel.

Madelein

Die Afrikaanse sanger Ricus Nel het in 2017 die liedjie “Madelein” neergepen. Wie was Madelein?

Megan

In 2015 het die liedjieskrywer en lid van Twee, Herman Kleinhans, die liedjie “Vir Megan” geskryf. Het Megan toe haar laaste soen vir hom gelos?

Jessica

Die Ray Dylan-liedjie “Jessica” (2008) word steeds ná al die jare op gesokkie.

Susanna

In 2009 het Dozi die liedjie “Susanna Soen My” gesing. Het Susanna hom al gesoen?

Angeline

Die Afrikaanse sanger Robbie Wessels het in 2012 die liedjie “Angeline” geskryf. Het hy toe ooit die sonneblom vir haar gegee?

Nicolene

In 1978 het wyle Gé Korsten die liedjie “Nicolene” gesing.

Sophie

In 2018 het die die sanger Stefan Burger die liedjie “Sophie se Kaggel” geskryf.

Lenie

Die rockgroep Spoegwolf het in 2012 die liedjie “Lenie Blou” geskryf. Het hy toe Lenie terug gewen?