Mathys Roets was moeg daarvoor om mense nie meer in die oë te kon kyk nie. Waar hy altyd langer as die meeste van sy vriende was, moes hy ná sy motorfietsongeluk waarin hy verlam is na almal opkyk.

Die sanger Kevin Leo wat altyd sy kort pêl was, het ewe skielik sy lang pêl geword, spot Mathys.

Toe besluit hy genoeg is genoeg en bestel vir hom 'n spesiale stoel wat van oorsee af ingevoer is. Met dié stoel kan hy met 'n enkele beweging opstaan. Spesiale bande word om Mathys se bene en bors vasgemaak om te voorkom dat hy vooroor val wanneer hy staan. Hierdie meganiese stoel het hom 'n aardige bedrag gekos: R86 000. Die geld het uit die Met Mathys Trust gekom, wat kort na sy ongeluk gestig is.

"Dís die verskil wat my vriende en die mense daarbuite met die trust gemaak het. Hierdie stoel maak 'n groot verskil aan my menswees. Ek het 'n behoefte gehad om mense in die oë te kyk. Om te kan staan as ek braai en om in 'n kroeg waar my pêlle almal met 'n bier in die hand staan, saam met hulle te kan staan. En dan om weer te kan staan en sing . . . Nou kan ek."

Mathys Roets in sy nuwe rolstoel

Phyllis Green, SARIE-fotograaf, het Mathys in sy nuwe stoel afgeneem. Sy ken hom al 20 jaar. "Dis opmerklik hoe die ou Mathys weer dáár is wanneer hy in sy nuwe stoel staan. Hy't 'n ander tipe selfversekerdheid as in sy sit-stoel."

* Hy onthul sy nuwe stoel by sy Droomvrouens-vertoning wat 10 en 11 November by die Centurion Teater te sien is. Met dié vertoning sing hy liedjies wat groot liedjieskrywers soos Leonard Cohen, Neil Diamond, Koos Kombuis vir die spesiale vroue in hul lewens geskryf het - vroue soos Marianne, Caroline, Lisa, Maggie en Delilah...

Hy het beloof om tydens die konserte "iets te doen wat ek sedert die ongeluk nog nie kon doen nie en dít is om mense in die oë te kyk".

 

"Net dít alleen maak 'n reuse-verskil in hoe ek oor myself voel." - Mathys Roets