Hulle het mekaar tydens die Wêreldbeker-sokkertoernooi in 2010 by 'n liefdadigheidsgeleentheid vir die WAGS ("Wives and girlfriends of football players") ontmoet.

"My aandag was nie eens by die WAGS nie, dit was net by háár," vertel Sean. "Ek het sommer in my tweede sin gevra of sy my na die opening van my en Deon Opperman se musical Shaka Zulu sal vergesel. Ek kon my geluk nie glo toe sy onmiddellik ja sê nie!

"Eerstens was sy die mooiste vrou wat ek nog gesien het. En toe ons begin gesels, het ek besef hoe onbewus sy van haar voorkoms is en hoeveel pret ons saam het. Die belangrikste ding is dat sy soveel liefde in haar siel het wat sy met elkeen deel."