Ná Steve Hofmeyr se topverkoper-biografie, Mense van my asem, volg Vier Briewe vir Jan Ellis (Zebra Press, Struik, R120), 'n verhaal wat hom aan die Weskus van Suid-Afrika afspeel. Die boek getuig volgens die uitgewers van Steve se "kennis van sy grond, sy land en sy mense." Dié "kragtige" verhaal word in enkele bladsye vertel wanneer 'n onskuldige posbode weens 'n sameloop van omstandighede in groot moeilikheid beland. Die karakters staan magteloos voor kerkleiers, die regstelsel en 'n gemeenskap wat hulpeloses soms in die steek laat.

Só sê die uitgewers:

"Vier Briewe vir Jan Ellis, 'n boek oor 'n doodgewone spreekwoordelike "klein" mannetjie spreek grootse kwessies aan sonder dat 'n "boodskap" op die leser afgedwing word. Die taal is getrou aan dié wat gepraat word op Jacobsbaai en Diazville, kusdorpe aan die Weskus wat die skrywer na aan die hart lê."

Die boek word in April vanjaar by die KKNK bekendgestel.