Die Van Wyks woon dolgelukkig op hul plaas op Loxton in die Karoo saam met hul jaar en ’n half oue seuntjie, George.

Tickey en Selme-Louise sê hulle is ’n doodnormale paartjie wat op ’n unieke manier ontmoet het, maar ook soos almal anders die pot aan die kook moet hou. “'n Mens kan byna nie glo dat 'n so program kan werk nie, maar ons glo die Here het ons paaie laat kruis,” vertel Selme-Louise.

Sy was voordat sy in 2008 aan Boer soek ’n vrou deelgeneem het ’n onderwyseres in Nelspruit en dit sou onwaarskynlik wees om ’n boer van Loxton raak te loop ...

“Ons is steeds mal oor Boer soek ’n vrou. Ons mis nie ’n episode nie!” bieg Selme-Louise. Sy sê sy gaan van vooraf saam met die meisies deur die emosies soos die reeks vorder.

Alhoewel die media nie meer op hulle toesak nie, vertel sy dat daar wel nog mense is wat hulle op straat herken en kom groet, maar dat dit baie minder is. “Ek dink die feit dat ons 100 km uit die dorp op ’n grondpad bly, help seker ook!” skerts sy.

Oor George sê sy: “Hy het ons lewe só verryk. Dit is vir ons ’n wonderlike voorreg om ouers te kan wees.”

Hul dae op die plaas lyk nooit dieselfde nie, veral oor klein George. Maar gewoonlik eet hulle almal saam boeremeelpap. Selme-Louise sê sy het nooit daarvan gehou nie, maar kan nou nie haar lewe daarsonder voorstel nie!

Ná ontbyt gaan Tickey veld toe. “Ek en George skei dan room af en sorg dat daar varsgebakte brood in die oond is, want die dorp is mos ver. En'n boer hou van 'n bord gekookte kos in die middag, so tussendeur laat ek die potte prut op die stoof.

“Ek speel ook juffrou-juffrou met George, en ons speel baie opvoedkundige speletjies.”

Wanneer George in die middag slaap, doen Selme-Louise die boerdery se boeke. En as hy wakker word, gaan boer hulle saam met pappa Tickey.

In die aande is hulle flou, maar tog het dié wonderlike paartjie steeds tyd om die Loxton-boeresportdag wat net om die draai is, te reël!