Hierdie is 'n uitgawe wat 'n spesiale plekkie in die geskiedenis se argiewe gaan hê. G'n wonder Rolanda moes ook model wees vir Amaria se mode-artikel nie, geïnspireer deur 'n paar SARIE-voorblaaie van toeka. (Ek hoop oor 60 jaar van nou af dink iemand ook dis mooi genoeg om te gebruik as verwysing vir SARIE se 120ste verjaarsdag!)

Dit kos werk. Die gewone passings en hare en grimering soos elke maand. Ek was ook braaf genoeg om régte diamante te gebruik as bykomstighede, iets wat ek nooit doen nie. Die risiko. Regte diamante is net 'n té groot verantwoordelikheid - dis versekering en sekuriteitswagte en sulke goed, baie boring en afgewaterde onderwerpe om oor te praat. Maar spesiaal moes dit wees.

Dan was daar ook besoekers. 'n TV-span van M-Net se nuwe glansprogram All Access. Tussendeur haardroërs en grimeerkwassies is die span besig om die dag vir ewig op kamera vas te vang. Wat 'n intimiderende gedagte, vir ewig! Vir die res van my lewe kan enigeen gaan kyk wat het gebeur op dié dag. Mense kan oor 5 jaar iewers die SARIE optel en bestudeer. Of M-Net kontak en die beeldmateriaal kry. Vir ewig is 'n helse blêrrie lang tyd! Verskoon my dus as ek sê ek was gespanne. Nee, ek was 'n wrak. Ek is seker jy vertaan, jy sou ook wees. Ek moet maak of als oukei is terwyl ek uit alle oorde deur kameralense dopgehou word.

Rolanda geniet dit egter. Ek wonder of sy nie op 'n manier gemakliker is voor die TV-kameras as voor 'n stilkamera nie. Dis immers haar werk as aktrise.

Dan neem Phyllis ook nog die "agter die skerms" af sodat julle nou, môre en volgende week en volgende jaar kan kyk wat ons op dié dag gedoen het.

Rolanda. Voorblad. Wat 'n lieflike, lieflike voorblad!