Het jy ooit gedink jy sou internasionale rolle speel?

Elke aktrise wil mos maar. Maar ek’t nie gedink ek sou ooit gekies word vir die rol van Nerine, François Pienaar se vrou, nie, want die oudisies is wêreldwyd gehou.

Invictus is ’n Clint Eastwood-fliek. Is daar ’n groot verskil tussen sy regie en ’n plaaslike regisseur soos Katinka Heyns s’n?

Elke regisseur werk anders. Hulle is albei die ongelooflikste regisseurs, eties en daarom suksesvol. En hulle het ’n buitengewone talent vir stories en kuns.

En Matt Damon?

Matt is fabulous, hy’s ’n familieman en skerp. Hy mingle met almal, maak grappies as ons af-tye het, vertel stories oor sy rolle, vra my of ek dink hy die aksent orraait doen en of hy François Pienaar goed uitbeeld. Dis ongelooflik dat hy my vra, want wie is ek nou eintlik? Dis cool dat hy almal as dieselfde sien. Sy gesin is vir hom alles. Ek respekteer dit.

Is daar iemand wat raad gee oor hoe jy by die première moet optree?

Daar’s nie so iets in SA nie, ons is min gespin met sulke la-di-da goed. Oorsee is dit ’n baie groot projek en ek’t paniekbevange geraak toe ek besef ek moet ’n rok kry, en ek’s boonop power met hare en grimering. My vriend het vir my ’n asemrowende rok gekoop in Frankryk en pragtige hoëhakskoene. Nou kyk, so lief vir kaalvoet soos ek is . . . hakskoene met ’n mooi rokkie van Frankryk af? Ag, elke meisie se droom.

Dit klink alles baie lekker, maar moet vir ’n groentjie intimiderend wees?

Ja. Ek het die eerste paar dae op stel nie ’n woord gepraat nie. Ék, van alle mense. Maar bygesê: ’n Mens probeer professioneel wees. Daar’s ’n tyd en plek vir als en ek kan dink daar’s seker niks meer irriterends vir ’n filmspan as ’n jong akteur wat rondhol en yap-yap-yap nie. Aikôna, jy moet jou plek ken.

En toe reël Clint Eastwood se vrou vir jou nog ’n rol in ’n ander fliek?

Ek wens!

So dis nie waar nie?

Nee, ek weet nie waar mense daaraan kom nie, dis nou ’n voorbeeld van iemand wat iets hoor en dit verkeerd verstaan. Daar’s wel ’n ander projek waaroor ek niks mag sê nie.

Sal jy permanent in Amerika of Londen gaan bly vir jou loopbaan?

Elke akteur sal bereid wees. Dis iets waarheen baie van ons werk.

Hoe sal jy rolle kry in die geweldig mededingende Hollywood?

Die koek is net soveel groter daar. Daar’s meer geleenthede, maar ook meer akteurs! As ek die kans kry, sal ek soontoe gaan om my nuuskierigheid te blus. Jy moet net onthou jy is ’n individu. Ek vergelyk my nie met ander akteurs nie. Om in Hollywood in te kom is nie maklik nie. Maar niks is onmoontlik nie.

Jy gaan in dieselfde tou staan as Reese Witherspoon, besef jy dit?

Ek sal vir haar ’n WP-rugbytrui gee!

* Die internasionale première van Invictus - met die hele filmspan – is op 11 Desember in Kaapstad