Ja, die model Katryn Kruger en haar jonger broer, Albert, is mooi - sonder enige twyfel. Met hul donker hare en vol wenkbroue kan niemand hulle miskyk nie. Maar goeie gene is nie die enigste ding wat dié twee gemeen het nie. Hulle deel ook ’n liefde vir koffie, die mooi goed in die lewe en kleintyd op hul oupa se plaas ...

Albert het hul oupa Hennie se bos hare gekry, vertel Katryn. “Oupa het tot op sy oudag hierdie dik hare gehad. Albert is so gelukkig!” 

Sy sit in die grimeerstoel van ’n Kaapse ateljee, Albert oorkant haar. Boet en sus maak gereed vir ’n SARIE-fotosessie. “O, ek ervaar ’n mengelmoes van emosies,” bieg Fanie Cronjé, SARIE se styl- en sosiale redakteur, soos hy hulle gereed maak vir die kamera. “Julle is so mooi, ek weet nie of ek verlief is op julle of eintlik net pleinweg jaloers is nie.”

FOTO Leana CR

Daar is geen greintjie ydelheid by die Krugers te bespeur nie. “Ja, ons hou van mooi aantrek en die mooi goed in die lewe. Ons hou daarvan om onsself te versorg, maar dis hoe ons grootgemaak is,” vertel Katryn. 

Hul ma, Aletta, kon jy nog altyd deur ’n ring trek. “Maak nie saak waarheen sy gaan nie, ons ma het nog altyd mooi aangetrek. Versorg, sy het geweldige selftrots. Ek dink ons styl kom baie van haar af,” sê Albert. 

Simplisties, skoon, sjiek. 

Hulle is nooit in watte toegedraai nie. O, nee! Op oupa Hennie se melkplaas is hul karakter geslyp - so tussen die diere en sy houtwerk deur. ’n Groot deel van hul vormingsjare het op daardie plaas plaasgevind.

Kleintyd op oupa Hennie se plaas. FOTO Verskaf

’n Storieboek-oupa, so beskryf hulle hom. “Naweke was ons op die plaas, skoolvakansies ook. Ons het die lammers melk gegee. Hy het houtwerk gedoen en ons sou saam met hom in die skuur sit,” onthou Katryn. “Die reuk van saagsels bring nou nog herinneringe op.”

En klokslag 11:00 was dit teetyd, ’n ritueel wat nou nog na aan Katryn se hart lê. Sterk Engelse tee. “Bedien aan tafel en in ’n teepot.”

Albert voeg vinnig by: “Dís wat familie vir ons is. Om rondom ’n tafel te kuier, dit was die fondasie van ons gesin. Dis hoe ons grootgemaak is.”

Voor sy dood het oupa Hennie vir Katryn en haar man, Cilliers Kies, vertel van sy droom om vir hulle ’n eetkamertafel te maak. “Hy kon dit nooit bou nie, maar het al die hout vir ons uitgesit. Ons het die tafel laat maak en nou word daar behoorlik om die tafel gekuier. Soos my oupa dit sou wou hê.”

Dis om die einste tafel waar haar Koffie met Katryn-geleenthede aangebied word.

“Ek en Albert het so baie by Oupa geleer. O, ek mis hom.”

Vinkel en koljander FOTO Verskaf

Katryn en Albert was nog altyd geheg aan mekaar - al het sy op die ouderdom van 16 ’n internasionale model geword en het hulle soms nie eens op dieselfde vasteland gebly nie. 

“Ons was nog altyd vinkel en koljander, close aan mekaar, mekaar se beste vriende,” vertel Katryn. “Ons deel ook ’n sin vir humor.”

Toe hulle nog tieners was, het Katryn baie gereis vir haar modelwerk. “Waar ander sibbe koppe sou stamp, het ons die tyd gebruik om te reconnect,” sê Albert. “Al was sy meer weg as by die huis, was daar ’n ongelooflike gevoel van trots by my. Nie almal kon sê hul suster loop internasionale loopplanke nie!” 

In haar matriekjaar het Katryn modelwerk eers gelos. “Ek en my broer het toe nog closer geword. Ek voel daar het ek hom weer leer ken.”

FOTO Leana CR

Van kleintyd af kon hulle oop kaarte met mekaar speel, sê Katryn.

“Ons kan oor diep goed praat. Ek kan met hom klankbord. Jy het regtig sulke mense nodig.”

Albert is tans ’n student aan die Universiteit Stellenbosch en mik na sielkunde. “Ek het nog altyd ’n liefde vir mense gehad ... Maar wat ek by Katryn geleer het is, verskoon my Frans, om jou shit te hanteer. Katryn is altyd Katryn, al pak sy klomp goed aan. Sy is koel en kalm.”

Daar was tye dat hulle uitmekaar gegroei het, erken Katryn. “Omstandighede, verskillende fases, tyd. Maar ons het daaroor gepraat. Ons is weer naby.”

Voor die kamera is albei ewe gemaklik. Hoe dan anders? Dis in hul gene!