Die sangeres Patricia Lewis is op Vrydagaand, 19 Maart (om 19:30) te sien in 'n splinternuwe program van Supersterre op SABC2 waar sy geleentheid bied aan Suid-Afrika se hoopvolle, talentvolle sangers om supersterre te word. Sy het met Marguerite van Wyk gesels oor die nuwe beoordelaar, haar gesondheid en hoekom sy dink Supersterre wérk!

Hoe voel jy oor dié splinternuwe reeks?
Báie opgewonde. Ek is reg vir die ding. Ek was nou 'n hele rukkie af gewees en is moeg vir die see en strand toe gaan. Dis nou weer tyd om te werk.

Watter nuwe planne het jy met dié program?
Dit bly basies dieselfde. Daar is een nuwe beoordelaar, wie se naam ek nog nie kan bekendmaak nie. En daar is vyf nuwe stemafrigters. Nicky van den Berg is nie meer 'n beoordelaar nie, want hy is nou in die politiek. Die nuwe beoordelaar gaan ons baie lekker laat lag!

Hoekom wérk Supersterre?
Werklikheidstelevisie is baie gewild. Mense wil deelnaam aan talentwedstryde. Hulle wíl sterre wees watop TV verskyn. Daar is wonderlike afrigters wat almal groot supersterre is en die kykers wil hulle in aksie sien. En die boordelaars - die sanger Theuns Jordaan en aktrise Sharleen Surtie-Richards - gaan ons lekker laat lag. Die nuwe beoordelaar is ook nie skaam om sy ding te sê nie.

 
Die tumors is steeds daar, maar ek voel goed. - Patricia
 
Wat is die belangrikste dinge waarna die beoordelaars kyk?
Natuurlik sangtalent, hoe deelnemers optree en hul verhoogpersoonlikheid. Hulle probeer vasstel of deelnemers die media sal kan hanteer en in die vermaaklikheidsbedryf sal inpas. Of hulle behoorlik met die pers sal kan gesels - hulle behoort 'n beter job daarvan te doen as wat ék nou doen. Ek is in die verkeer op pad na Bloemfontein, besig om die verkeer teprobeer dodge. Vanaand is die eerste van die laaste oudisies van Supersterre in Bloem.

Patricia se foto-album

Lees wat jy nie van Patricia geweet het nie, en kyk Patricia se gunsteling-foto's

Hoe voel jou gesondheid deesdae ná ses tumors sowat ses maande gelede op jou stembande gediagnoseer is?
Die tumors is steeds daar, maar ek voel goed. Die afgelope ses maande het ek verskillende behandelings ontvang. Van osoon-behandeling, waar jy gekonsentreerde suurstof inasem (amper soos Michael Jackson se suurstoftenk destyds -- daar was method in his madness, nou span medici dit in!) tot vitamienes en homeopatiese behandelings. Ek sal ses weke ná die opnames van Supersterre weer vir 'n stembandskandering gaan, maar kan nie nou nog daardie stres ook hanteer nie. Ek oefen ook weer deesdae en het 3 kg verloor van die 9 kg wat ek opgetel het. Ek is steeds maar plomp.

Watter ander planne het jy vir 2010 -- 'n nuwe CD?
Supersterre
neem baie van my tyd in beslag. Daar is nie tyd om my eie loopbaan te bevorder nie. Maar ek is heeltemal tevrede. Ek het eintlik 'n plafon bereik. Dis nou tyd om terug te gee aan die bedryf. Ek en my man vervaardig die hele Supersterre-produksie en werk saam met 85 mense. Ek sal vanjaar nog sing in shows. Ses maande gelede het ek duette gedoen saam met die Amerikaanse akteur David Hassehoff en 'n jaar gelede het ek 'n CD vrygestel. Oor 'n jaar stel ek dalk nog een vry. Ons bou 'n huis in Balitobaai in KwaZulu-Natal en doen ook eiendomsontwikkeling daar, so ons is lekker besig.