Sy het die Girls Fly Programme in Africa (GFPA) in 2010 gestig om meisies op laer- en hoërskool bewus te maak van loopbane in die wetenskap, tegnologie, ingenieurswese en wiskunde. Die program bied ook lugvaart- en ruimtevaart-kampe aan en bedryf ’n vliegskool vir vroue en jongmeisies. Sedert die stigting het meer as 100 000 meisies al aan die programme deelgeneem.

Dis vir Refilwe so ’n passie juis omdat sy weet wat dit is om beperkte drome te hê. As een van sewe kinders in ’n enkelouer-huishouding in die Lenyenye-township in Limpopo, was daar min geleenthede vir haar. Maar sy was omring deur vroue wat hul plek in die samelewing volgestaan het en sy wou dieselfde doen, sê sy – ’n verskil maak.

“My ma was ’n skoolhoof en het in haarvrye tyd vir kinders in die omgewing musieklesse gegee; sy wou altyd mense help. Dr. Mamphela Ramphele was ons buurvrou. Toe sy langs ons intrek nadat sy tydens apartheid na Tzaneen verban is, was dit die eerste keer dat ek ’n vrouedokter gesien het – boonop ’n swart vrouedokter. Ek het net daar besluit ek wil ook ’n dokter word.”

Maar die lewe het nie so uitgedraai  nie, en Refilwe moes ander maniere vind om ’n verskil te maak. Sy het ’n graad in mikrobiologie verwerf met die plan om later met medies aan te gaan, maar kon weens uitstaande gelde nie haar uitslae kry en verder studeer nie.

“Ek het ’n werk as lugwaardin gekry om geld te probeer maak en daar het ’n nuwe wêreld vir my oopgegaan. Ek het besluit ek wil ’n vlieënier word, iets wat min vroue doen, en só grense verskuif.”

Refilwe het aansoek gedoen by die Suid-Afrikaanse Polisiediens om vlieglesse te kan neem en later as helikoptervlieënier vir die SAPD gewerk terwyl sy ook haar kommersiële vlerke gekry het. Haar droom is ’n Afrika waar elke meisie opgevoed, gereken en bemagtig is. “GFPA wil nie noodwendig meisies aanmoedig om in die lug- en ruimtevaart te werk nie, maar wil hê hulle moet besef daar is nie ’n beroep wat hulle nie beskore is nie.”