Wat is dit?

1. Odem
’n Mediterreense variëteit met ’n donkerpers skil en liggeel binnekant. Die skil is ryk aan antioksidante en behou sy kleur wanneer die aartappel gebak, gerooster of diepgebraai word, maar word effens ligter as dit in water gekook word. Die tekstuur is donserig met ’n sterk, geurige aartappelsmaak. Geskik vir bak of rooster. Heeljaar beskikbaar.

Hoe gebruik ek dit?
Odem aartappelbakkies

(4 porsies)

  • 5 middelslag-aartappels
  • 1 knoffelhuisie, fyngekap
  • 5 ml droë gemengde kruie
  • 60 ml botter, gesmelt
  • 1 prei, in skyfies gesny
  • 5 repe spek, grofgekap en brosgebraai
  • 100 ml parmesaankaas, gerasper
  • sout en varsgemaalde swartpeper na smaak

Was die aartappels goed, maar moenie skil nie. Sny in dun skywe en meng goed met die knoffel, kruie, botter en prei. Geur met sout en swartpeper. Pak 4 ramekins (klein bakkies) halfvol met die aartappelmengsel en sprinkel die spek en sowat 75 ml parmesaankaas bo-oor. Pak die res van die aartappelmengsel bo-op en sprinkel die laaste parmesaankaas oor. Bak teen 220 °C vir sowat 30 minute tot die aartappels sag is.

Wat is dit?

2. Roseval
’n Baie skaars Franse variëteit met ’n besonderse vorm en helderrooi skil. Die binnekant is geel en wasagtig met ’n heerlike, effens neuterige smaak. Die roseval verloor nie sy kleur as dit gekook word nie. Gebruik dit in aartappelslaaie, gratins en soufflés. Beskikbaar van Februarie tot April en dan weer in September tot November.

Hoe gebruik ek dit?
Roseval-gratin

(4 porsies)

  • 8 aartappels, geskil
  • 250 ml room
  • 2 knoffelhuisies, fyngekap
  • 1 tiemietakkie, fyngekap
  • 2 ml sout
  • 15 ml mielieblom, met ’n bietjie melk gemeng
  • 10 ml olyfolie
  • 1 ui, in skyfies gesny
  • 175 ml gruyèrekaas, gerasper

Stoom die aartappels tot sag en sny in 15 mm-skyfies. Verhit die room, knoffel, tiemie en sout tot kookpunt. Draai die hitte af en laat liggies prut vir 15 minute. Voeg die mielieblommengsel by die roommengsel sodat dit verdik. Verhit die olyfolie in ’n pan en braai die ui stadig vir sowat 15 minute tot dit gekaramelliseer het (roer gereeld). Meng die aartappelskywe met die verdikte roommengsel en gooi die helfte daarvan in ’n gesmeerde oondbak. Sit die helfte van die gekaramelliseerde ui bo-op en herhaal. Strooi die kaas oor en bak teen 150 °C vir 1½ - 2 uur tot die aartappels sag is.

Wat is dit?

3. Asparges
Asparges is nog ’n skaars Franse variëteit, met ’n kenmerkende buisvorm, blink, geel skil en prominente ogies. Die binnekant is wasagtig en het ’n unieke kastaiinggeur wat toeneem as dit afkoel. Dis ideaal vir kook en baie veelsydig, veral in slaaie. Sjefs beskryf dit as ’n ware fynproewer-aartappel. Beskikbaar van Februarie tot April en van September tot November.

Hoe gebruik ek dit?
Asparges-aartappelslaai met pesto

(4 porsies)

500 g aartappels, ongeskil
1 rooi soetrissie
75 ml gemarineerde songedroogde tamaties
hand vol vars basiliekruidblare
2 knoffelhuisies
75 ml parmesaankaas
75 ml dennepitte
sout en swartpeper na smaak
nog vars basiliekruidblare

Kook die aartappels vir sowat 12 minute in soutwater tot sag. Dreineer en sny in 2,5 cm blokkies. Rooster die soetrissie teen 180 °C vir sowat 25 minute tot sag. Haal uit die oond, sit in ’n bakkie en bedek met kleefplastiek vir so 10 minute. Sit die songedroogde tamaties, basiliekruid en knoffel in ’n voedselverwerker en kap fyn. Gooi nou die parmesaankaas, dennepitte en die helfte van die olyfolie by en meng goed. Voeg die res van die olyfolie en sout en swartpeper by en meng tot glad. Meng pesto met die aartappels. Skil en ontpit die geroosterde soetrissie wat onder die plastiek gesweet het en sny in groot repe. Roer deur die aartappelslaai en strooi ekstra basiliekruidblare oor.