EVITA se KOSSIE SIKELELA het reeds meer as 40 000 eksemplare verkoop en is aangewys as die wenner in SA van die Gourmand World Cookbooks-toekenning vir 2010 in die kategorie beste maklike resepteboek. Marita van der Vyver se Summer food in Provence is die wenner in die kategorie Franse kookkuns.

Albei die boeke gaan nou teen wenners van ander lande te staan kom vir die Gourmand Best In The World-toekenning wat in Maart 2011 in Parys, Frankryk, toegeken word.

Evita is baie bly oor die toekenning. “Ek is opgewonde en plesierig oor hierdie nuus en gee spesiale eer aan Linda Vicquery, wat die meeste van die werk gedoen het terwyl ek die meeste van die gewig opgetel het! Die beste in Suid-Afrika is beter as die beste in die wêreld!” het sy gesê oor die prys.