TREND #1 Oosterse smake

Buiten dat die Wêreld-beker-rugbytoernooi vanjaar in Japan is, is die wêreld se oë reeds geruime tyd gerig op die Ooste – vir inspirasie van dekor tot kos. Tendense soos macramé, shibori (’n knoop-en-dooptegniek) en bestanddele soos sriracha (gefermenteerde brandrissiesous) is al ’n ruk met ons, maar nou gaan meer van hierdie bestanddele hul verskyning maak. Plaaslik sien ons reeds in supermarkte produkte soos yuzu (’n suurlemoenvariëteit), matchatee en panko-broodkrummels. Ook geregte soos mochi (soet rysmeeldeeg gevul met onder meer roomys), shabu-shabu (’n Japanse weergawe van fondue waar kos in warm aftreksel gaargemaak word pleks van olie) en burosu (’n kragsop wat gekook word van murgbene). Ons reken jy kan maar die geure van die Ooste huis toe bring en dit meng met klassieke SA smake.

Kaneeldoughnuts met miso-fudge

TREND #2 Fynbos

Dink jy aan unieke Suid-Afrikaanse geure, kom fynbos sekerlik by baie mense op. Dié geur van die Wes-Kaap is besig om die wêreld te oorrompel. Veral Kaapse boegoe. Voorheen bekend vir sy medisinale gebruik, is boegoe deesdae deel van die geregte op internasionale sjefs se spyskaarte. Daniel Humm is die sjef by Eleven Madison Park in New York, een van die voorste restaurante in die wêreld. Volg jy hom op Instagram, sien jy gereeld fynbos-inspirasie soos oesters met boegoetee-jellie en selfs rooibos-gerookte kammossels (scallops). Ons reken dis hoog tyd dat ons die geure van ons land plaaslik meer vier. Begin met soet geure soos roosmalva (rose geranium), sitrusmalva (citrus geranium) en ja, ook boegoe.

Roosmalva-boegoe-en-perskeblaarvla

TREND #3 Roomkaas-tee

Ja, jy lees reg, en nes jy het ek gedink die wêreld is finaal die kluts kwyt toe ek die eerste keer van dié tendens op plaaslike kosblogger Anél Potgieter se blad lees. Totdat ek meer oor die gier, wat sy kop in Japan uitgesteek het, te wete gekom het. Dink aan cappuccino wat ons graag drink, maar pleks van warm koffie, yskoue tee met ’n sagte wolk van roomkaas, kondensmelk en geklopte room. Dis soet en ’n anderste bederf. Tradisioneel word dit met groen- of swarttee gemaak, maar ons wortels is mos stewig in Suid-Afrika geanker. Ek reken ons maak dit ons eie met rooibostee, ’n skeut fynbosheuning en dalk ’n knerts kaneel.

Rooibos-roomkaastee

TREND #4 Neutbotters

Dit is geen geheim nie dat ons al hoe meer gesondheidsbewus raak en gesondheid begin by wat ons eet. Kasjoeneut-, makadamianeut- en selfs haselneutbotter het reeds hul kleim afgesteek. Stap jy by plaaslike kosmarkte rond, sien jy entrepreneurs wat jou die geleentheid bied om jou eie vars botter self by hul stalletjies te maak. Die volgende groot tendens volgens kenners is saadbotters soos pampoensaad-, sonneblomsaad- en sesamsaadbotter (tahini, van sesamsaad, uit Noord-Afrika is al ’n wyle op ons spyskaarte). Plaaslik is saadbotter nog yl gesaai, maar begin deur iets soos kasjoeneutbotter, wat onder meer goeie vette vir breingesondheid bevat, deel van jou maaltyd te maak. ’n Smeersel oor roosterbrood of ’n lepel vol in jou ontbytpap is ’n heerlike begin vir jou dag. Dit werk ook in slaaisous of onder jou oondbraai-hoender se vel saam met knoffel en suurlemoen.

Komkommerslaai met kasjoeneutsous

TREND #5 Keto

Vir ’n paar jaar was die Banting-dieet groot nuus. Maar deesdae is die keto-dieet op baie se lippe. Dis geskoei op die beginsels van bant, maar met ’n hoër vetinhoud. Dié dieet fokus daarop dat meer vet in jou dieet jou liggaam help om natuurlik vet te verbrand en so die kilogramme af te skud. Plaaslik volg bekendes soos akteur Armand Aucamp die keto-dieet, met ’n keto-kookboek, Armand kook kaal (Lapa, R380), wat reeds verskyn het. Ook Mareli Visser, wenner van kykNET se eerste Koekedoor-reeks en VIA se Koektannie, maak opslae nadat sy 30 kg met die dieet afgeskud het. Op bl. 103 deel sy haar keto-broodresep met SARIE-lesers, en ja, die brood word gebak sonder enige meel. (Jy kan Mareli se volledige storie lees en haar dieet kry in SARIE KOS Herfs, wat nou te koop is.)

Keto-brood

TREND #6 Boetiekrum

Die laaste paar jaar het ons die groot jenewer-herlewing beleef. Nou reken tendenskenners kan ons uitsien na die groot rum-revolusie. Ons praat hier van rum wat vir ses jaar in houtvate verouder word, met komplekse geure van melasse en heuning, en speserygeure soos kaneel en steranys. Plaaslik is daar al klaar ’n hele rits boetiekrums op die mark. Inverroche, die voorloper van die plaaslike jenewertendens, het reeds hul eerste rum bekend gestel. Of jy kook of bak, die geur van rum is perfek. Dink bruin vleissouse met ’n skeut rum, of onderstebokoeke met rumkaramel. As jy onseker is wanneer om te kook met rum, gebruik dit waar jy tradisioneel brandewyn sou gebruik. Vir nog oor rum, hou die winkelrakke dop vir ons Junie-uitgawe met 5 nuwe planne.

Piesang-en-rum-onderstebo-koek