(6 porsies)

Stap 1: Bestanddele vir hoenderaftreksel

  • 1,4 kg hoenderstukke (vrylopend), met been en vel
  • 1,5 liter water
  • 250 ml (1 koppie) droë witwyn
  • 2 selderystokke, in skywe gesny
  • 2 wortels, geskil en in ringe gesny
  • 4 lourierblare
  • 6 kruienaeltjies
  • 6 wonderpeperkorrels (pimento)
  • 10 swartpeperkorrels
  • 10 ml (2 teelepels) sout

Plaas al die bestandele in ’n middelslag-kastrol en verhit tot kookpunt. Verlaag temperatuur en prut vir 2 uur. Indien nodig, voeg ekstra water by. Die vleis sal sag en sappig  wees. Skep hoenderstukke uit in bak en laat afkoel. Giet aftreksel deur sif en plaas in yskas. Skep vet af en meet 2 koppies (500 ml) aftreksel af. Verwyder bene en vel van hoenderstukke. Sny of trek vleis in medium-repies en -stukkies. Gooi 100 ml van die aftreksel oor die vleis om dit vogtig te hou, bedek en plaas in yskas.

 Stap 2: Parmesaandeeg

  • 500 ml (2 koppies) koekmeel
  • 15  ml bakpoeier
  • 80 g parmesaankaas, fyngerasper
  • knippie sout
  • 200 g koue botter, gekap
  • 115 g roomkaas

Plaas meel, bakpoeier, kaas en sout in voedselverwerker. Verwerk vir 4 sekondes. Voeg botter by en meng tot ’n “broodkrummel”-tekstuur. Voeg roomkaas by en verwerk tot deeg vorm. Skep uit en knie deegmengsel liggies, bedek met kleefplastiek  en plaas in yskas vir 30 – 40 minute.

 Stap 3: Roomsous vir vulsel

  • 45 g (3 eetlepels) botter
  • 6 heel preie, fyngesny (net die wit gedeelte)
  • 125 g gerookte Duitse spekvleis (of gewone varkspek), fyngesnipper
  • 400 g verskeidenheid van sampioene (seisoenaal), grofgekap
  • 250 ml (1 koppie) soet sjerrie (Muscadel)
  • 6 takkies tiemie se blare, fyngekap
  • skil van 1 suurlemoen, fyngerasper
  • 45 ml (3 eetlepels) koekmeel
  • 400 ml hoenderaftreksel (afgekoel)
  • 125 ml (½ koppie) dik room
  • 45 ml (3 eetlepels) vars suurlemoensap
  • 30 ml (2 eetlepels) Dijon-mosterd
  •  knippie rooipeper (cayenne)
  • sout en varsgemaalde swartpeper

Verhit botter in groot pan en braai preie stadig oor lae hitte, tot begin verbruin. Verhoog hitte en voeg spek by en roer vir 5 minute. Voeg sampioene by, roer tot ligbruin. Voeg sjerrie, tiemie en suurlemoenskil by. Roer en laat helfte van vloeistof wegkook. Verlaag hitte en roer meel by. Klop aftreksel (400 ml) by en prut stadig vir 3 – 5 minute tot mengsel verdik. Voeg room by. Skep gevlokte hoender by roomsous en roer deeglik. Roer suurlemoensap, mosterd en rooipeper by en geur met sout en peper. Laat afkoel.

 Stap 4: Berei pasteikors en afronding

  • 20 – 25 cm-pasteibak (rond, ovaal of vierkantig), liggies gebotter
  • 1 eiergeel vir pasteideeg  glasuur
  • sesamsaad vir garnering

Deel deeg in twee porsies, 2/3 vir onder en kant-gedeelte en 1/3 vir bolaag van pastei. Rol die groter deegporsie 3 – 4 mm dik uit (geen meel word ekstra benodig nie). Hanteer versigtig, lig kante met mes en lig met rolstok in bak. Deeg is baie sag. Gebruik orige deeg om oop plekkies op te vul. Skep hoendervulsel in kors. Rol kleiner deegporsie (die bokant) 3 – 4 mm dik uit en plaas bo-oor hoendervulsel. Knyp en rol die kante bymekaar. Gebruik skerp mes om verskeie snymerke in deeg te maak. Glassuur deeg met eiergeel en sprinkel sesamsaad bo-oor. Plaas hoenderpastei in yskas vir 30 minute. Voorverhit oond tot 230 °C. Bak pastei vir 5 minute. Verminder temperatuur tot 200 °C en bak vir 20 – 25 minute tot goudbruin (indien kors te gou bruin word tydens bak, bedek met foelie).Geniet met seisoenale vars slaai en knoffelbroodjies.