(4 porsies)

Marinade

  • 500 ml laevet Bulgaarse jogurt
  • sap van halwe suurlemoen
  • sowat 8 vars basiliekruidblare, grofgekap
  • 2 knoffelhuisies, fyngedruk
  • sout en varsgemaalde swartpeper na smaak

Meng al die bestanddele goed saam.

Kebabs

  • sowat 800 g ontbeende hoenderdye, sonder vel (gebruik so 4 of 5 stukkies hoender vir elke kebab)
  • 8 vars lourierblare (opsioneel)
  • 1 rooi-ui, in kwarte gesny

Ryg een stuk hoender op ’n metaal-kebabstokkie en dan ’n vars lourierblaar, dan nog ’n stuk hoender en ’n stuk rooi-ui. Volg dit weer met ’n hoenderstuk, lourierblaar en dan nog hoender. Wanneer al die kebabs gemaak is, plaas hulle in ’n oondbak en gooi die marinade oor. Draai die kebabs in die marinade om tot hulle goed bedek is. Laat vir minstens 30 minute in die yskas marineer. Verhit jou oond tot 180 °C. Maak die oondbak toe met tinfoelie (onthou, blink kant na binne) en bak in die oond vir sowat 20 minute. Haal uit en verwyder die tinfoelie. Jy sal sien die marinade het geskif en dit lyk nie baie aptytlik nie, maar toemaar, jy gaan die kebabs nog vinnig braai. Verhit ’n riffelpan (as jy nie een het nie, gebruik ’n gewone pan) tot baie warm. Braai die kebabs vir so 2 minute aan weerskante. Sit voor saam met sprietui-kapokaartappels.

Sprietui-kapokaartappels

  • 6 aartappels, geskil
  • 30 ml botter of laevet margarien
  • sowat 100 ml laevet melk, effens verhit
  • sout en varsgemaalde swartpeper na smaak
  • 3 sprietuie, gesny

Plaas die geskilde aartappels in ’n kastrol met koue water. Bring tot kookpunt en kook die aartappels tot sag. Dreineer en druk fyn. Voeg botter of margarien by en meng deur tot gesmelt. Voeg die warm melk by - nie alles op een slag nie - tot jy tevrede is met hoe dik die kapokaartappels is. Om klonte te voorkom kan jy dit deur ’n sif druk. Geur met sout en swartpeper en roer die sprietuie deur.