(6 porsies)

  • 1,2 kg beesfilet
  • 50 ml olyfolie
  • sout en varsgemaalde swartpeper na smaak
  • 2 vars roosmaryn-takkies
  • ½ papaja
  • 50 g spanspek
  • 50 g appel
  • 50 g peer
  • 50 ml witwyn-asyn
  • 5 ml suiker
  • groot handvol vars roket-blare

Risotto

  • 2 sprietuie
  • 12 ml olyfolie
  • 500 g porcini-sampioene, in dun skywe gesny
  • 500 g (580 ml) arborio-rys
  • 1,5 liter hoender-aftreksel
  • 100 g botter
  • 50 g parmesaan-kaas, gerasper

Garneer met

  • 10 ml Sweet Fire Sauce

Braai die filet in 25 ml van die olyfolie. Geur met sout en swartpeper. Stroop die roosmaryn-blaartjies af en gooi in die pan - maak seker dat die filet goed kontak maak met die roosmaryn. Verwyder van hitte en laat afkoel. (Afhangend van hoe gaar jy dit wil hê, kan jy die filet vir ’n kort rukkie onder die rooster-element sit om verder gaar te word.) Kap die vrugte in piepklein blokkies, net ’n paar millimeter groot. Voeg die asyn, oorblywende olyfolie en suiker by. Geur met sout en swartpeper. Meng deur om die suiker op te los en laat staan. Was die roket-blare en rangskik op die opdienbord. Kap die sprietuie fyn en soteer liggies in die 12 ml olyfolie. Voeg die sampioene by en soteer tot sag. Geur met sout en swartpeper. Braai die rys in ’n skoon kastrol totdat die puntjies van die rys net-net deurskynend word. Voeg ’n koppie hoender-aftreksel by en kook stadig totdat dit geabsorbeer is. Herhaal die proses tot al die aftreksel gebruik is, of die rys gaar en sag is. Wanneer die rys sag is, gooi die sampioene en sprietuie by en roer die botter en kaas deur. Roer baie vinnig om ’n effense emulsie te vorm. Onthou, risotto moenie styf wees nie, maar effens sag. Jy moet dit ook nie laat staan voor bediening nie. Sny die filet in skywe en rangskik bo-op die roketblare. Bedruip met Sweet Fire Sauce. Bedien onmiddellik saam met die risotto en garneer die filet met die vrugte-salsa en nog vars roosmaryn.