Die Franse gebruik Calvados - appelbrandewyn - maar aangesien ons sider (appelbier) nie so droog is soos dié in Frankryk nie, span ek ’n goeie SA brandewyn in, soos 10 jaar oue KWV. Die hele storie is lank en stadig, en die geduld net ’n plesier.

  • 1,5 tot 2 kg lamsboud, op die been
  • 1 bottel droë wit wyn
  • 2 x 375 ml-bottels droë sider (Hunter’s Dry of Savannah)
  • twee koppies brandewyn
  • 2 takkies roosmaryn, fyn gestamp
  • 250 ml suurroom
  • sout en vars gemaalde swartpeper na smaak

Week die boud vleis in ’n bottel goeie droë wit wyn vir minstens 12 uur. Draai elke 3, 4 uur om. Gooi wyn weg en smeer die boud met sout, peper en vars, fyngestampte roosmaryn. Plaas die boud in ’n braaipan. Voeg die sider en brandewyn by en bedek die boud met foelie. Plaas in ’n lae oond (130 ° C) vir 5 uur. Haal die foelie af en sit die boud terug in die oond vir nog 2 uur. Bedruip die vleis die laaste twee uur met die sous. Haal uit en terwyl die vleis rus, roer die suurroom saam met die sous. Sny die sagte vleis in skywe en sit voor met groente en gebraaide aartappels.