Vinnige cassoulet

Dis ’n gereg uit die suide van Frankryk. Vir die tradisionele resep het jy minstens drie dae nodig. My weergawe neem nie naastenby so lank nie, maar is steeds lekker.

6-8 porsies

30-40 ml olyfolie

8 varkworsies (Toulouse-wors)

4 gerookte, ontbeende varkrepe, in 4 cm-blokke gesny

1 ui, fyngekap

1 selderystok, in skywe gesny

1 groot wortel, in blokkies gesny

 2 knoffelhuisies, fyngekap

1 x 410 g-blik gekapte tamaties

3 blikke cannellini-bone, gedreineer

250 ml witwyn

250 ml groenteaftreksel

3 takkies tiemie

2 lourierblare

sout en varsgemaalde swartpeper

150 g broodkrummels 

Verhit oond tot 180 ?C. Gooi olyfolie in ’n oondkastrol en verhit op stoofplaat. Braai varkworsies tot net bruin – hulle hoef nog nie gaar in die middel te wees nie. Haal uit en halveer. Hou eenkant. Braai varkreepblokkies tot bruin en bros. Haal uit en hou eenkant. Plaas ui, seldery, wortel en knoffel in dieselfde kastrol. Braai tot sag. Plaas vleis terug in kastrol en voeg tamaties, bone, wyn en aftreksel by. Voeg tiemie en lourierblare by. Geur met sout en peper. Sit deksel op en laat prut vir 20 minute. Haal van hitte af en sprinkel broodkrummels bo-oor. Sit kastrol in oond en bak vir 1 uur.

Italiaanse piekniekbrood

Dié lekkerte is amper soos brood en terrien wat een word. 

genoeg vir 6 

1 groot suurdeegbrood

30 ml botter

200 g ingemaakte soetrissies

200 g sagte bokmelkkaas

100 ml basiliekruidpesto

200 g spekkonfyt

200 g mengsel van koue vleise

30 g roketblare

sout en varsgemaalde swartpeper na smaak 

Sny die bokant van die brood oop en hol die binnekant uit. Smeer binnekant met botter. Pak die res van die bestanddele in lae binne die brood en plaas bokant van brood terug op gevulde brood. Geur goed met sout en peper. Plaas op ’n bakplaat en draai toe met kleefplastiek. Sit nog ’n bakplaat bo-op. Sit iets swaars daarop soos blikkies tamatie en laat vir sowat 1 uur in die yskas afkoel. Sny in kwarte en sit voor.

Chorizo-empanadas

’n Heerlike peuselhappie waarvoor min mense kan nee sê.

genoeg vir 12

225 g (400 ml) koekmeel

5 ml sout

120 g botter

45 ml yswater

45 ml olyfolie

1 ui, fyngekap

2 knoffelhuisies, gekap

400 g hoenderborsies, in growwe stukke gesny

225 g chorizo-wors, in ringe gesny

1 brandrissie, fyngekap

5 ml gerookte paprika

1 x 400 g-blik tamaties, fyngekap

sap en gerasperde skil van 1 suurlemoen

sout en varsgemaalde swartpeper

1 eier, liggies geklits

Verhit oond tot 180 °C. Plaas koekmeel, sout en botter in voedselverwerker en verwerk teen hoë spoed tot die tekstuur van fyn broodkrummels. Voeg yswater by en verwerk tot alles in een bal saamkom. Laat rus in yskas terwyl jy die vulsel maak. Verhit olyfolie in ’n middelslagpan. Voeg uie en knoffel by en braai liggies tot goudbruin. Voeg hoender en chorizo by en braai tot dit begin verbruin. Voeg brandrissie, paprika, tamatie, sap en skil van suurlemoen by. Verlaag hitte en laat stadig prut vir 25-30 minute of tot romerige mengsel. Geur goed met sout en swartpeper. Laat afkoel. Rol deeg tot sowat 3 mm dik op ’n meelbestrooide oppervlak uit. Sny sirkels van sowat 12 cm uit. Skep lepels vol van vulsel op helfte van deeg. Vou ander helfte bo-oor en druk deegrand stewig vas. Verf met geklitste eier. Plaas op bakplaat uitgevoer met bakpapier en gespuit met kleefwerende kossproei. Bak vir 20-25 minute of tot goudbruin. Sit warm voor.


Soek jy 'n ander episode se resep?

Episode 1: Koring

Episode 2: Pruime

Episode 3: Charcouterie

Besoek Spekko Rice se webtuiste vir meer resepte. 

Volg ook Spekko Rice se FacebookTwitter en Instagram-blaaie.