My ma het dit geniet om in die kombuis doenig te wees met koekies bak, lekkers maak en om my pa, wat ’n uiters kieskeurige eter was, met sy gunsteling-kos te bederf. Sy het gedurig resepte afgeskryf, baie keer resepte wat oor die radio in rubrieke soos So Maak Mens van Esmé en Jan of Vrouerubriek voorgelees is. Die resepte het symeestal verander om by my pa se kossmake aan te pas.

[Die afskrywery loop in die familie, want ek het ook nog die resep wat my oudste, Marnus, vir my afgeskryf het toe hy in graad 1 was: warm sjokoladesous vir roomys.] Ná my ma se afsterwe in April 2001 het ek van haar resepte gehou as “aandenkings”.

Die appeltertresep was een van talle resepte wat sy deur die jare neergeskryf het. Omdat dinge maar altyd vinnig moet geskied in die Du Plooy-huishouding, met vier skoolgaande kinders en talle projekte, het ek die resep net verander om by my “kookstyl” (as jy dit só kan noem) van “alles-net-bymekaar-
gooi” en die kinders se liefde vir lekker sous aan te pas.

Die karamelsous is ’n variasie van die resep wat Christiaan altyd maak vir die roomys op die wafels wat
hy en Brahamgraag vir ons gesin bak. (Ja, ek het my drie seuns van kleins af oortuig dat as jy kan lees, jy ’n resep ook kan lees en dit maak of bak!) Die appeltert-resep kan dus lank en omslagtig lyk, maar
terwyl die sultanas in die brandewyn week, word die korsbestanddele gou bymekaargegooi en geklits, en die appels geskil. Die klappermengsel word ook net alles bymekaar gevoeg en gemeng terwyl die appels kook en die tert is selfs sonder die karamelsous ook nog lekker.

Die resep wat my ma neergeskryf het, was sonder die brandewyn, sultanas en karamelsous. Die karamelsous-inspirasie het ontstaan by ’n ander gebakte appeltert wat sy ook gewoonlik vir ons
gemaak het (met ’n karamelgeursel- sous wat bo-oor uitgegiet is). Jaki, my enigste dogter en die jongste, help ook al fluks resepte toets.

Appeltert

Kors

  • 50 ml strooisuiker
  • 50 ml botter, sag en by kamertemperatuur
  • 1 ml sout
  • 1 groot eiergeel
  • 250 ml koekmeel
  • 5 ml bakpoeier

Verroom strooisuiker, sagte botter en sout goed saam. Voeg die eiergeel by en klop weer baie goed. Sif koekmeel en bakpoeier saam by die bottermengsel en meng goed in. Druk dié kors vas in ‘n goed gesmeerde ronde tertbord van so 20 – 23 cm in deursnee.

Vulsel

  • 125 ml sultanas
  • 150 ml brandewyn
  • 5 groot kookappels, geskil, ontpit, in kwarte gesny en dan in dunnerige skyfies
  • 125 ml bruinsuiker (of meer as appels baie suur is en ‘n soeter tert verkies word)
  • 15 ml botter
  • 1 ml sout

Week sultanas 1 uur lank in die brandewyn. Voeg dan die appels, sultanas saam met die brandewyn en al die ander bestanddele in ‘n kastrol en kook versigtig totdat die appels net-net sag is. Gooi die appelmengsel warm uit op die kors en versprei eweredig. Skep dan die bolaag oor die appellaag in die kors.

Bolaag

  • 250 ml suiker
  • 1 groot eier en ook die eierwit van die kors, geklits
  • 250 ml klapper
  • 1 ml sout
  • 5 ml brandewyn

Klop suiker en eier saam en voeg dan die ander bestanddele by. Meng goed en skep oor die appellaag in die kors. Bak vir sowat 30 tot 40 minute tot gaar by 180 °C. Wanneer die tert uit die oond kom, gooi ek dadelik die volgende karamelsous oor die warm tert (as ek dit die dag ekstra-spesiaal wil laat smaak):

Karamelsous

  • 125 ml bruinsuiker
  • 25 ml botter
  • 180 ml volroom-melk, verhit tot byna by kookpunt
  • 5 ml karamelgeursel
  • 5 ml brandewyn

Karamelliseer die bruinsuiker en botter versigtig totdat dit begin bruin word en verwyder van hitte. Voeg verhitte melk versigtig by en roer totdat die suiker opgelos is. Voeg die karamelgeursel en brandewyn by en roer die sous voordat dit net so warm egalig oor die appeltert uitgegiet word.