(6 - 8 porsies)

Sjokolade-deeg

  • 280 g (500 ml) koekmeel
  • 210 g (250 ml) strooisuiker
  • knippie sout
  • 15 ml kakao
  • 190 g (210 ml) ongesoute botter, in blokkies gesny
  • 2 eiergele
  • 15 ml koue water

Plaas meel, strooisuiker, sout en kakao in voedselverwerker. Voeg botter by en meng totdat dit soos broodkrummels lyk. Klits eiergele en water saam. Voeg by mengsel en meng tot deeg vorm. Maak deeg toe met kleefplastiek en plaas in yskas vir minstens 2 uur. Verhit oond tot 180 °C. Rol deeg uit op meelbestrooide oppervlak en voer 'n gesmeerde losboomquiche- pan van so 23 cm daarmee uit. Plaas 'n groot stuk bakpapier bo-op en vul met droë bone. Bak vir 20 minute. Maak seker die deeg is gaar - die tert gaan nie weer oond toe nie. (Onthou, die bone kan nie weer gebruik word nie, behalwe om 'n deegdop blind te bak.)

Sjokolade-vulsel

  • 200 g 70%-donkersjokolade, in stukke gebreek
  • 300 ml room
  • 30 ml kakao, gesif
  • sjokolade-krulle

Plaas sjokolade en room in 'n bak wat oor kastrol met water - wat net gekook het - pas. Laat sjokolade en room saam smelt. Roer nou en dan. Voeg kakao by en meng goed. Gooi mengsel in gaar tertdop en plaas in yskas tot gestol. Sit voor met sjokolade-krulle en styfgeklopte room.