Hoenderlewerpatee met soetwynjellie

genoeg vir 6

25 g botter

1 ui, fyngekap

2 knoffelhuisies, gekap

15 ml tiemieblare, fyngekap

600 g hoenderlewers

40 ml brandewyn

15 ml tamatiepasta

160 ml room

sout en varsgemaalde swartpeper

Jellie

250 ml soetwyn

15 ml gelatienpoeier

30 ml water

agurkies, brood en vars vye vir voorsit

Verhit botter tot warm in ’n middelslag-pot. Voeg uie, knoffel en tiemie by. Braai liggies tot ui goudbruin is. Voeg hoenderlewers by en braai verder tot goudbruin, sowat 5 minute. Voeg brandewyn en tamatiepasta by en meng goed. Laat brandewyn wegkook en voeg room by. Laat stadig prut vir sowat 5 minute of tot room met helfte verminder het. Geur goed met sout en swartpeper. Laat afkoel. Plaas mengsel in voedselverwerker en verwerk tot gladde patee. Verdeel mengsel tussen glasflesse van jou keuse. Sprinkel gelatien oor water enlaat staan vir 1 minuut. Terwyl gelatien spons bring soetwyn tot kookpunt. Verwyder van hitte en skep geweekte gelatien by warm wyn. Meng tot gelatien gesmelt is. Gooi bo-oor patee en plaas in yskas tot gestol  (2-3 ure) Sit voor met roosterbrood, agurkies en vars vye.

 

Kortlamskenskels in rooiwyn

Hierdie bly een van my trooskosse, dis amper soos beestert in rooiwyn maar met lam.

genoeg vir 6

140 g (250 ml) koekmeel

2 kg kort lamskenksels

50 ml olyfolie

3 groot wortels, ringe gesny

2 uie, fyngekap

2 huisies knoffel, fyngekap

1 lourierblaar

1 bottel (750 ml) rooiwyn

250 ml beesstert-aftreksel

5 ml droë gemengde kruie

sout en varsgemaalde swartpeper na smaak

10 kwepers

800 g suiker

2 liter water

sap en skil van 1 suurlemoen

Verhit oond tot 180 ºC. Rol die lamstukke-stukke in meel en skud oortollige meel af. Verhit helfte van olie in 'n oondkastrol. Braai die vleis so 3 - 4 stukke op 'n slag tot bruin en hou eenkant. Jy sal swart stukkies in die kastrol sien. Dis die meel. Maak die kastrol skoon en verhit die res van die olyfolie daarin. Voeg die wortels, uie en knoffel by. Braai die groente vir sowat 10 minute tot die uie sag en deurskynend is. Plaas die vleisstukke bo-op die groente. Voeg die lourierblaar, rooiwyn en aftreksel by. Geur met kruie, sout en peper. Sit die deksel op en plaas in warm oond. Jy moet die bredie dophou sodat dit nie droog kook nie. As jy sien dit raak droog, kan jy 'n bietjie van die kookwater byvoeg. Verlaag die hitte van die oond ná 3 uur tot 160 ºC. Laat verder stowe vir nog 1 uur. Die vleis moet letterlik van die bene afval. Terwyl bredie kook Sit suiker, water, sap en skil van suurlemoen in groot pot. Bring tot kookpunt en plaas kwepers in pot. Laat stadig prut vir 2 uur of tot kwepers oranje en deurskynend is. Sit warm kerrie voor met kwepers en rys.

 

Rooiwyn-roomys

Glo my, dié resep is die moeite werd! Dis romerig, met ’n ongelooflike rooiwyn-geur. Op TV het ons dit met droë ys gevries, maar jy kan dit ook in jou roomysmasjien doen.

genoeg vir 6 porsies

1 bottel (750 ml) rooiwyn

1 kaneelstok

3 peperkorrels

250 ml melk

250 ml room

105 g (130 ml) suiker

4 eiergele

knippie sout

2 ml vanieljegeursel

1 kg fyn droë ys

Gooi wyn in ’n kastrol. Voeg kaneel en peperkorrels by. Bring tot kookpunt en laat oor lae hitte afkook tot sowat ’n halwe koppie. Dit neem so 1 uur. Bring melk, room en helfte van suiker tot net by kookpunt in ’n ander kastrol. Klits eiergele en voeg van die warm melk-en-room geleidelik by. Gooi terug in kastrol saam met res van suiker, sout en vanieljegeursel. Klits afgekookte rooiwyn by en roer oor lae hitte met houtlepel tot die mengsel die agterkant van ‘n lepel bedek. Gooi deur ’n sif. Plaas in jou roomysmaker en volg instruksies, of gooi in ’n vlak bak wat in die vrieskas kan gaan. Bevries, en roer elke uur tot yskristalle afgebreek is. Vir die TV het ons droë ys gebnruik wat dit baie vining vries.

Soek jy 'n ander episode se resep?

Episode 1: Koring

Episode 2: Pruime

Episode 3: Charcouterie

Episode 4: Kersies

Episode 5: Ingemaakte vrugte en speserye

Episode 6: Botter

Episode 7: Biltong

Episode 8: Brandewyn

Episode 9: Buchu

Besoek Spekko Rice se webtuiste vir meer resepte. 

Volg ook Spekko Rice se FacebookTwitter en Instagram-blaaie.