Vanaand op #Inspirasiekos Met SARIE: Herman Lensing toor met botter. 

Gnocchi met bone en bruin botter 

Daar is iets spesiaals aan tuisgemaakte pasta. Dit laat jou dadelik bederf voel. 

4 porsies

2 aartappels, gekook tot sag, skil verwyder 

1 eier 

210 g (375 ml) meel, plus ekstra vir uitrol 

sout en varsgemaalde swartpeper na smaak 

80 ml botter 

10 salieblare 

70 g groenbone, gedompel in kookwater

70 g suiker-ertjies, gedompel in kookwater 

Druk gaar aartappels deur ’n sif tot ’n fyn puree. Voeg eier en meel by en meng tot ’n hanteerbare deeg. Voeg nog meel by, indien nodig, totdat dit nie meer klewerig is nie. Geur goed met sout en swartpeper. Laat rus vir 20 minute. Verdeel deeg in 4 en bestrooi ’n oppervlak met meel. Gebruik jou vingerpunte en rol deeg in lang silinders uit, sowat 2 cm dik. Sny gerolde deeg in 2 cm lange gnocchi en hou eenkant terwyl jy die res uitrol. Kook ’n groot pot vol water en gooi gnocchi in. Sodra hulle dryf, is hulle gaar. Dreineer en hou eenkant. Smelt botter in ’n groot pan. Voeg salieblare by, gevolg deur bone. Braai vir 5 minute en voeg gaar gnocchi by. Braai vir 5 minute. Geur goed met sout en swartpeper. Sit warm voor. Wenk Besoek jou naaste deli as jy nie tyd het om self gnocchi te maak nie. Hulle hou won-derlike gnocchi aan wat byna net so lekker is.

Aspersies met regte hollandaise

Luuks en heerlik

genoeg vir 4

3 eiergele 

500 g botter, gesmelt 

sap en skil van 2 suurlemoene 

sout en varsgemaalde swartpeper 

500 g vars aspersies 

Bring ’n pot met water tot kookpunt en sit ’n glasbak bo-op. Die bodem van die bak moenie aan die water raak nie. Verlaag hitte tot water net stadig prut. Gooi eiergele in bak en klits met ’n draadklitser tot lig en romerig. Sit botter stadig by terwyl jy aanhou klits tot mengsel dik en romerig is. Haal van hitte af. Voeg sap en skil van suurlemoen by. Geur goed met sout en swartpeper na smaak. Bring nog ’n pot water tot kookpunt. Breek onderste punte van aspersies af en sit aspersies in kookwater. Laat vinnig kook vir 1 minuut tot sag maar nog krakerig. (Al dente, soos die Fransman sal sê!) Dreineer aspersies en sit voor met hollandaisesous.

Bagna càuda

Die sous heet bagna càuda, wat Italiaans is vir “in ’n warm bad”. Probeer dit as voorgereg – jy sal net nog en nog wil eet! Maak dit met geklaarde botter waarvan die melkvet verwyder is. 

genoeg vir 6 

250 ml olyfolie 

5 knoffelhuisies, fyngekap 

15 ansjovisfilette

 ’n hand vol gekapte Italiaanse pietersielie 

125 ml geklaarde botter 

skil van 3 suurlmeoen

1 kop (sowat 340 g) blomkool, gestoom tot halfgaar en in los blomme gebreek 

Plaas olyfolie in middelslag-pot en verhit tot louwarm. Voeg knoffel en ansjovis by. Roer met draadklitser oor hitte tot ansjovis baie fyn is en mengsel geurig ruik. Verwyder van hitte en voeg pietersielie by. Laat effens afkoel tot louwarm. Klits botter lepel vir lepel by tot mengsel romerig raak. Geur met peper – sout is onnodig. voeg suurlemoen by. Gooi in opdienbakkies en sit voor met blomkool.

Soek jy 'n ander episode se resep?

Episode 1: Koring

Episode 2: Pruime

Episode 3: Charcouterie

Episode 4: Kersies

Episode 5: Ingemaakte vrugte en speserye

Besoek Spekko Rice se webtuiste vir meer resepte. 

Volg ook Spekko Rice se FacebookTwitter en Instagram-blaaie.