Kersfees is al van kleintyd Nataniël se beste tyd van die jaar, want dis wanneer die familie bymekaargekom het by sy ouma-hulle se huis op Wellington. Dán het hy so lekker konsert gehou.

“Ek was sommer Maria, Josef én Jesus!” erken hy prontuit. Deesdae kom die familie een jaar in die Kaap en die volgende jaar in Pretoria byeen. Vanjaar vier hulle Oukersaand by die Overture-restaurant buite Stellenbosch (die restaurant maak nét vir hulle oop!).

Op SARIE se Kers-fotosessie was Nataniël en Madri in hul element. Wat beter as ’n blou fotosessie met ’n wit poedel, ’n mensgroot Adventkrans, ses ballerinas as “bykomstighede” en ’n vlootblou Vespa? Om alles te kroon was die foto-ateljee in Woodstock, Kaapstad, in ’n gerestoureerde kerk, propvol atmosfeer. Toe die kamera begin kiek, was dit asof Nataniël op die verhoog is. Gereed om te gee. Madri het rondgedartel in hemelhoë Jimmy Choo-skoene. Dat hy haar held is, is duidelik.

VIDEO van Kersmode-fotosessie met Nataniël en Madri