1. EET GEREELD

Dit beteken meestal drie maaltye per dag – maar dalk ’n klein happie tussenin om jou bloedsuiker beter te beheer, soos ’n hand vol rou neute en koppie rooibos- of groentee en skyfie suurlemoen. Dit maak dit makliker om porsies klein te hou en jou nie aan kos te vergryp nie. Probeer saans nie te laat eet nie.


2. PAS OP VIR TE VEEL PROTEÏEN

Eet matige porsies vleis, eiers en kaas en beperk geprosesseerde vleis (bv. spek, koue vleise en biltong). Dit bevat gewoonlik heelwat sout. Proteïen en sout kan ’n rol speel om jou niere te beskadig, ’n moontlike probleem by diabete. 


3. KONTROLEER JOU KOOLHIDRAAT-INNAME

(Dis die versamelnaam vir suikers en stysels.) Kies onverfynde en onverwerkte produkte. Dis gewoonlik die produk met die kortste lysie bestanddele en waarvan die voorbereiding meer tyd en moeite verg. Hou porsies klein en eet verspreid deur die dag saam met ’n gebalanseerde bord kos – dus nie alles op een slag nie, al is dit sogenaamd lae GI. (Dis nie noodwendig die gesonder keuse nie.) As kos verwerk en verfynd is (dus iets wat jy moeilik in jou kombuis sou kon vervaardig bv. kits-graanpap), is dit soveel makliker om meer te eet, want dit verg minder kouwerk. As jy stadig eet en kos goed kou, help dit op sigself om bloedsuikervlakke in toom te hou. Sommige diabete sal koolhidrate strenger moet kontroleer as ander.


4. STAPEL JOU BORD VOL GROENTE

Al die kleure van die reënboog. Veral groen blaargroente (soos spinasie, krulkool (kale) en kool), en ook kruisblommige groentesoorte (bv. broccoli, blomkool en Brusselse spruite). Kombineer dit met ’n lekker slaaisous van “goeie” vet (olyfolie, ens.). Onthou: Styselgroente (aartappel, patat, botterskorsie, mielies), tel eerder as stysel omdat dit meer gekonsentreerde bronne van koolhidrate is.


5. MAAK SLIM VETKEUSES

Dit het steeds ’n effek op bloedsuiker, hoewel minder akuut as bv. suiker of stysel. Dit het ook ’n invloed op toestande wat hand aan hand met diabetes gaan, soos hartsiekte. Gebruik liefs onverwerkte plantaardige vette (bv. olyfolie, avokado en –olie, neute en neut-olies), pleks van versadigde vette van diere en plant-produkte (vetterige vleis, kokosneut-olie en palmvet). Kies maerder vleissnitte en gebruik liefs ’n bietjie olyfolie by jou slaai.

Lees ook: Diabetes: Jou vinnige eetgids