Jou dieet en oogsorg

Om eenvoudige oogsorggewoontes deel van jou daaglikse roetine te maak, is makliker as wat jy dink. Wêreldsigdag op 9 Oktober 2014 val saam met Nasionale Oogbewustheidsmaand (23 September tot 20 Oktober), daarom deel ons dié maand wenke vir goeie oogsorg. Vandag kyk ons na wat jy kan eet om jou oogsorg te bevoordeel.

Mellins i-Style, ’n voorste groep optometriste in Suid-Afrika, het die volgende wenke vir gesonde visie en oogsorg:

Oogsorgstudies die afgelope 20 jaar verbind gesonde eetgewoontes met ’n verlaagde risiko vir ouderdomverwante makulêre degenerasie. Hierdie toestand is die oorsaak van ’n klein kolletjie naby die sentrale deel van die retina, die deel wat noodsaaklik is vir sentrale visie.

Hierdie studies toon dat ouderdomverwante sigprobleme verhoed kan word deur gereeld voedingryke kosse te eet wat sink, luteïen, seaxantien, vitamien C en E en omega 3-vetsure bevat:

Sink

Sink is een van die mees gekonsentreerde minerale in die oog. Dit werk ook as as ’n "molekuulhelper" of "vervoermineraal" omdat dit vitamien A vanaf die lewer na die retina help vervoer. Dié vervoerproses is noodsaaklik vir die produsering van melanien, ’n beskermende pigment in die oog.

  • Spinasie, pampoensade, neute en sjokolade is goeie bronne van sink.

Luteïen en seaxantien

Hierdie voedingstowwe verminder jou kanse om chroniese oogsiektes, insluitend ouderdomverwante makulêre degenerasie en katarakte, te ontwikkel. Katarakte veroorsaak wasigheid in die oog, wat dit moeilik maak om te sien.

  • Maak seker jy eet baie groen blaargroentes en moenie skaam wees om aan ’n vullende ontbyt met eiers weg te lê nie - eiers is ryk aan luteïen én seaxantien.

Vitamien C

Vitamien C is ’n belangrike mineraal wat die ontwikkeling van katarakte beveg. Wanneer dit saam met ander noodsaaklike bestanddele ingeneem word, kan vitamien C ook help om ouderdomverwante makulêre degenerasie en die verswakking van sig te voorkom.

  • Hou by die vyf-porsies-per-dag-reël om genoeg vrugte en groente in te neem.

Vitamien E

Vitamien E is ’n sterk antioksidant wat oogselle en -weefsel teen vrye radikale beskerm.

  • Jy kry dit in neute, aangemaakte pap en patats.

Vetsure (omega 3)

Nog ’n goeie rede om vette by jou dieet in te sluit is dat dit help met die instandhouding van die senuweestelsel, wat op sy beurt belangrik is vir die ontwikkeling van goeie visie en goeie retinale funksionering.

  • Voeg vis soos sardientjies of tuna by slaai en toebroodjies, kikker soutbeskuitjies en ryskoekies op met ’n geurige avokadosmeer of begin jou dag deur vlassaad by pap of muesli te voeg.