1. BÊRE JOU WEKKER

Jy rol rond en kyk hoe die wekker se wyser stadig oggend toe aankruie. Dit vererger jou stres wat slaap nog moeiliker maak. Sit dit weg!

2. DOEN-LYSIE

Skryf 5 minute voor slaaptyd puntsgewys alles neer wat jy die volgende paar dae moet doen. Proefpersone het daarna 9 minute gouer aan die slaap geraak as die kontrolegroep wat take moes neerskryf wat hulle reeds voltooi het, volgens ’n studie in die Journal of Experimental Psychology.

3. KOEL, DONKER KAMER

Jou liggaamstemperatuur reguleer jou liggaamsklok, wat onder meer slaap beheer. Raak jy aan die slaap, daal dit effens. Sommige kenners reken ’n laer liggaamstemperatuur help jou beter slaap. Sowat 15-20 0C is die mees slaapvriendelike slaapkamertemperatuur.

4. SKOOT YSWATER

As jy slaaptyd angstig en ontsteld is, druk jou gesig 30 sekondes lank in ’n bak met yskoue water. Dis ’n sneller vir ’n onwillekeurige respons by soogdiere bekend as die duikrefleks (mammalian dive reflex), wat jou hartklop en bloeddruk verlaag. En jy voel kalmer.

5. STORT

Neem ’n warm stort ’n uur voor slaaptyd. As jy daarna in die koeler lug uitstap, daal jou liggaamstemperatuur vinnig en jou metabolisme raak ook sommer gouer stadiger, wat jou liggaam vir slaap voorberei. Maak dit deel van jou slaaptydroetine.