Hawermout

Porsie: 1/2-3/4 koppie (vir haar); 1-1 1/2 koppie (vir hom) gaar

’n Bakkie heelkorrel- of sogenaamde steelcut-hawermout vir ontbyt bevat meer voedingstowwe as kitshawermout, is growwer en jy moet dus meer en langer kou. Stadiger eet dra by tot meer stabiele bloedsuikervlakke en energie.

Eiers

Porsie: 1-2 (haar); 2 (hom) p.d.

As jy tot vanmiddag versadig wil voel, kies dít bo ’n bord graankos vir ontbyt. Dit het minder kJ as wat jy dalk dink, sowat 330 vir ’n groot, hardgekookte een. En boonop baie proteïene, vitamiene en minerale.

Neute

Porsie: 20-30 g (haar); 30 g (hom) p.d. rou

Dit lyk asof die vet daarin die liggaam aanpor om hormone af te skei wat help om jou versadig te laat voel. Dis boonop die “goeie”, onversadigde soort. Neute is ook kos (prebiotika) vir die flora in jou maag, wat ’n rol by gewigsbeheer speel.

Bone

Porsie: 1/2-3/4 k (haar); 1-1 1/2 k (hom) p.d. gaar

Dit laat jou minder honger tussen maaltye voel, wat ’n gesonder gewig kan beteken. ’n Halwe koppie bone het net soveel kJ soos ’n dun sny brood – maar met proteïene, verskeie ander voedingstowwe asook vullende vesel.

Vis

Porsie: 90-130 g (haar); 120-150 g (hom) gaar

Propvol voedingstowwe. Vis (veral skulpvis soos mossels en calamari) bevat ook heelwat jodium, belangrik vir jou skildklier en dus ’n gesonde metabolisme. Sonder genoeg jodium kan skildklierhormone nie geaktiveer word nie, wat bydra tot lae energie, konstante “honger” en gewigstoename.

* Porsiegrootte vir deursnee-man/vrou wat effens aktief is

Bron: Mariza van Zyl, geregistreerde dieetkundige van die Paarl en skrywer van Dik vir dieet (Naledi). Kontak 021 872 8243, mariza@bettereat.net, www.bettereat.net