Terwyl die koue winter nog 'n kuiergas is, is die gedagte aan oefen nie baie aanloklik nie. En die lus vir trooskos gróót. As jy weglê aan kitskos en die grootste deel van die dag sit, kan jou kantoor jou vet maak. Selfs al oefen jou oor naweke.

Siek ook. Dit kan die risiko vir lewensbedreigende chroniese siektes, soos hartsiektes, diabetes tipe 2, hoe bloeddruk en beroerte verhoog, volgens die Hart-en-beroertestigting van Suid-Afrika.

Die goeie nuus is dat 80% van hartsiektes en beroerte voorkom kan word. Al wat nodig is, is ’n paar leefstyl-veranderinge. Die heel beste beleid is om gesonde kos saam te vat werk toe. Volgraanbrood, ’n slaai of gisteraand se oondgebakte groente en hoender.

Maar as die kostrollie wat klokslag ’n draai maak jou aanmekaar laat struikel, kies so gesond jy kan.

Muesli-muffins of sakkie neute?

Kies vir seker die neute. ’n Sakkie neute (40 g) het 840 kJ en 17 g vet, teenoor die muffin (120 g) se 1 900 kJ en 21 g vet.

Vrugterol of appel?

Die appel, natuurlik. Dis uitstekende peuselkos. ’n Vrugterol (80 g) het 1 127 kJ. ’n Appel net 300 kJ – met geen vet nie.

Maalvleis-samoesas of hoender-mayo-broodjie?

Moeilik om te glo, maar die hoender-mayo-broodjie is ’n ietwat beter keuse as die samoesas. 5 klein samoesas (60 g) het 1 470 kJ en 30 g vet. Die broodjie het wel meer kJ (1 830 kJ), maar net 15,6 g vet. 

Hoenderpastei of hoender-feta-en-pasta-slaai?

Dié twee loop so half kop aan kop wat die vetinhoud betref. ’n Pastei (140 g) het 1 790 kJ en 30 g vet. En die slaai (110 g) sowat 800 kJ en 23 g vet. Maar die slaai-porsie is kleiner en dit het dus ’n bietjie minder stysel (pasta), wat dit ’n beter keuse maak. Dit het ook ’n bietjie meer vesel.

Jogurt-sjokoladestafie of volroom-vrugtejogurt?

Jogurt-sjokolade het baie suiker. ’n Porsie (50 g) het 975 kJ en 11 g vet. Romerige vrugtejogurt (100 ml) is beslis beter – dit het 426 kJ en net 2,3 g vet.

Jelliebone of springmielies?

Jammer, suikertand, jelliebone kom tweede. (100 g = sowat 20 boontjies = 1 165 kJ en 2 g vet.) Springmielies bly die heel beste keuse: 2 koppies vol mielies = net 400 kJ en 1 g vet. 

Jou 4 wenke

Koop só slimmer van die kostrollie:

1. Besluit vooraf: Is dit ’n maaltyd, of wil jy peusel?  Peuselkos moet liefs nie meer as 500-800 kJ per keer bevat nie. En kombineer dit met ’n vrug.

2. Onthou! Jou maag moet versadig voel om die boodskap brein toe te stuur dat jy genoeg gehad het. Iets baie vetterigs maar klein – wat dus baie kJ het, maar nie vreeslik groot is nie – gaan jou laat aanhou eet. Kombineer etes en peuselgoed met ’n glas water of koppie rooibostee. 

3. Moenie eet terwyl jy werk/lees/loop nie – jou aandag is elders en voor jy jou oë uitvee, is die pak leeg. 

4. Vermy verfynde kos – witmeel, witbrood, muffins. Vrugte, neute en jogurt is ’n voedsame, kJ-vriendelike maaltyd of peuselhappie.

5. Onderhandel met die trollie-eienaar. As almal meer gesonde keuses vra – en dit koop – sal meer daarvan beskikbaar wees.