Sowat 90% van kankers word deur omgewingsfaktore veroorsaak.

Kortweg: By net 1 uit 10 mense wat kanker kry, ''loop'' dit in die familie. By 9 uit 10 mense is dit weens óf jou leefstyl, óf omgewingsbesoedeling, óf mensegemaakte stowwe (of 'n interaksie tussen dié dinge).

Dit was die plofbare boodskap by die opening van KANSA se Wetenskap- en Hulpbronsentrum in Kaapstad. Die spreker was prof. Devra Davis, 'n gerespekteerde Amerikaanse wetenskaplike. Haar boek, The Secret History of the War on Cancer (Basic Books, 2009), is terselfdertyd bekendgestel.

Dis geen geheim nie dat tabakrook, asbes en te veel son jou kanker kan gee. Wetenskaplikes soos Davis waarsku egter ook teen mensegemaakte stowwe wat skuil in produkte wat deel is van ons daaglikse lewe, soos die volgende:

*Akrielamied, 'n chemiese stof wat onder meer in aartappelskyfies (crisps) voorkom. Veral kinders moet minder daarvan eet.

*Chemiese stowwe in kleefplastiek. Daar is egter kleefplastiek daarsonder, onder meer Gladwrap en die handelsmerke van Checkers, PicknPay, Shoprite, SPAR en Woolworths.

*Bisphenol A: Vermy plastiek as dit 'n driehoek het met 'n 7 in die middel en die letters PC daaronder: veral by bababottels.

*Transvetsure: Eet gebak en geprosesseerde kosse met minder as 2% transvetsure. (Kyk op die verpakking). Vermy sulke kosse as die inhoud nie op die verpakking aangedui word nie.

Vir meer inligting besoek www.environmentalhealthtrust.org; of www.cansa.org.za.