Haar 2020 sou propvol avonture en reisdrome wees: Sy en haar verloofde, dr. Adriaan Myburgh, sou in April die Okavangodelta besoek het. In Mei sou sy ’n vierdag-bootcamp op Robertson en ’n Kaapse staptog vir vroue hou. En in September sou sy ’n groep vroue vat om vir sewe dae op Sicilië, Italië, te gaan stap. Maar toe word Covid-19 ’n pandemie verklaar en alles moes uitgestel word.

Sy mis die natuur, sy mis Kirstenbosch en Tafelberg, sy mis om fiets te gaan ry op Seepunt se promenade ... sy mis vryheid. Tog bly Linda positief. Haar jongste, Armin, het die grendeltyd by haar deurgebring. “Dit was tot dusver ’n spesiale tyd. Vir die eerste keer in ’n baie lang tyd was hy 24 uur ’n dag hier. Ons is groot maats ... maak saam kos, speel harde musiek terwyl ons saam huis skoonmaak. Hy’t ook sy eie Catan-bordspeletjie gemaak, wat vir ure se pret sorg.”

En hulle het saam oefenvideo’s vir haar sosialemedia-platforms gemaak.

Linda probeer alledaagse take positief takel. Elke beweging laat sy tel in grendeltyd. “Wanneer ek byvoorbeeld stofsuig, maak ek seker dat ek ook my maagspiere inspan met die vorentoe-, agtertoe- en oorkruis-aksie. As ek wasgoed ophang, squat ek om die wasgoed uit die mandjie te haal. Dis hierdie klein dingetjies wat ’n groot verskil maak.”

FOTO Instagram / Linda Kriel

Sy het nog altyd ’n passie vir gesondheid en oefening gehad. “Ek het van kleintyd af rooimiere gehad. My ma het my op vier vir balletklasse gevat oor ek eenvoudig nie kon stilsit nie.”

Wat is die moeilikste aspek van oefen? Om te begin, bieg Linda. Dis die grootste kopskuif. “Dit lê soos ’n berg voor jou. Die kopskuif wat jy moet maak, is om te besef dat elke klein beweging deur die loop van die dag help. Jy hoef nie ’n gimkontrak uit te neem of duur toerusting aan te skaf om te oefen nie.”

Linda meen ons huis is gevul met moontlikhede. 

“Gebruik goed in jou huis om te oefen. Gaan haal ’n tou uit jou motorhuis en sorg dat jy ná elke uur op die horlosie vir ’n minuut lank touspring. Het jy jong kinders in die huis? Sit hulle op ’n kombers of handdoek en sleep hulle deur die huis terwyl jy jou bene gebuig hou en agteruit loop. Dit doen wondere vir jou bobene en agterstewe. Wanneer jy sit en TV kyk, doen squats tydens die advertensiebreuk.”

Sy glo familie moet sommer saam oefen. Haar eie seuns, Zander en Armin, albei studente op Stellenbosch, het van kleintyd af saamgeoefen. “Hulle was kranige rugby- en krieketspelers op skool en albei het daarvoor SA sportkleure verwerf. Noudat hulle op universiteit is, stap hulle sommige naweke saam met my Tafelberg uit.”

Linda se twee seuns: Zander en Armin. FOTO Instagram / Linda Kriel

En die goue vraag: Is dit beter om voor of ná werk te oefen? “Baie mense wil weet watter tyd van die dag die beste is om te oefen en dis ’n goeie vraag. Die antwoord daarop is egter minder belangrik, dis regtig wat jóú die beste pas.”

Linda verkies om in die oggende te oefen. “As ek uitstel, kom ek gewoonlik later nie daarby uit nie.”

Maar ook sy het ’n skuldige plesiertjie wanneer dit by kos kom: Skyfies. “Lays of Big Corn Bites se tamatiegeur. Ai, as ek dit in my huis het, verorber ek sommer die hele pak op een slag op. Daarom hou ek dit nie gereeld in my huis aan nie.”

En wat is haar wenke om van daai muffin top ontslae te raak? Sy het vier stappe.

Linda se 4-stap-aksieplan

Om enige probleemarea kleiner te kry moet jy die volgende vier dinge doen:

Stap 1: Versterk die spiere met oefeninge

In die geval van ’n muffin top, doen verskillende maagspieroefeninge, nie net een nie. Verras jou spiere gereeld met ’n ander tipe maagoefening. Op my webwerf en Facebook-blad is daar ’n verskeidenheid van oefeninge. ’n Maklike een om te doen terwyl jy voor die TV sit, is om op die punt van jou stoel te sit en kant toe te buig tot jy jou enkel raak. Kom weer regop en buig dan na die ander kant. Hou deurentyd jou rug regop en maag ingetrek. Doen dit vir ’n minuut lank en herhaal ’n paar keer deur die dag.

Stap 2: Verbrand die vetlaag

Verbrand die vetlaag deur meer kardio-oefeninge te doen. Kardio verbrand vet. Die volgende val daaronder: stap vinnig of draf, vir 30 minute of langer; fietsry vir 30 minute of langer. Al my roetine-oefenprogramme (circuit) en hoë-intensiteitoefeninge kan op die Linda Kriel Fitnes-app verkry word.

3. Eet reg

As jy gesond en reg eet, sal jy die vrugte pluk.

4. Sny op jou alkoholinname

Al vier stappe moet saam toegepas word vir resultate.

Volg Linda op Facebook en Instagram of besoek haar webtuiste vir meer inspirasie.

Sy kan nie wag om weer in Kristenbosch en nog natuurplekke te gaan stap nie.FOTO Instagram / Linda Kriel

Spesiaal vir SARIE-lesers van Linda:

Ek het ’n heerlike resep wat ek met die SARIE-lesers wil deel. Dit is my nuutste gunsteling wat ek by die dieetkundige op my span, Anel Kirsten, gekry het. Dit is op my nuwe Mediterreense eetplan wat binnekort op my webtuiste en app beskikbaar sal wees.  

Marseilles-seekosbredie

(maak 4 porsies)

Bestanddele

* 1 ui, fyngesny

* 2 knoffelhuisies, fyngekap

* 2 teelepels gedroogde gemengde kruie

* ½ teelepel paprika

* 1 brandrissie, fyngekap

* 2 eetlepels olyfolie

* 120 g chorizo, in blokkies gesny

* ¾ koppie ontpitte olywe (swart of groen)

* 1 x 410 g-blik botterbone

* 1 x 400 g-blik gekapte tamaties

* sap en gerasperde skil van 1 suurlemoen

* 1 koppie melk

* 200-300 g seekos van jou keuse, bv. garnale, wit vis, calamari of mossels

* 2 koppies babaspinasie

* Sout en peper na smaak

* Vars pietersielie vir garnering

Metode:

Braai ui, knoffel, kruie, paprika en rissie vir ’n paar minute in olyfolie. Gooi chorizo by en braai vir 5-7 minute. Roer olywe, bone, geblikte tamaties en suurlemoensap by en laat prut vir 10 minute. Voeg melk en suurlemoenskil by. Laat prut vir 15-20 minute. Voeg garnale en spinasie by. Laat prut sonder om te roer vir 10 minute. Geur met sout en peper en garneer met pietersielie.

Sit voor met:

½ koppie gaar bruinrys en 1 koppie groenslaai