Nataniël se lensiedieet is byna africana. Toe dié dieet ‘n klompie jare gelede bekend geword het, het dit landwyd omtrent konsternasie veroorsaak. Skielik was almal op sy lensiedieet. So oor die jare het dit in mense se onderbewussyn vasgesteek en gereeld het ons navrae gekry om weer hierdie dieet te plaas. Ons het Nataniël dadelik gekontak. Hy doen dit nog so nou en dan, maar bedien dit gereeld as 'n bykos. So hier is dit, direk uit die perd te mond, en met kommentaar daarby!

Gebruik die bruinrys-en-lensiemengsel as 'n basis en varieer dit elke dag met verskillende bestanddele.

Dis vervelig. Maar as jy resultate wil sien, moet jy ly. Dis nie 'n piekniek of 'n troue nie." – Nataniël

Die basis

  • 1 ½ koppie bruinrys
  • ¾ koppie bruin lensies
  • 2 eetlepels sojasous
  • 1 teelepel kerriepoeier
  • 2 eetlepels olyfolie
  • 1 eetlepel bruinsuiker
  • seesout en varsgemaalde swartpeper
  • 2 tamaties, gekap
  • 1 ui, gekap

Spoel rys en lensies af en gooi saam met 1 eetlepel sojasous en kerrie in kastrol. Geur liggies met seesout. Bedek met water en kook tot gaar. (Gooi bietjies water by soos nodig, sodat jy nie die gaar rys hoef te dreineer nie.En moenie die goed pap kook nie, kou is al oefening wat ons nog kry.)

Roer res van sojasous, suiker, olie, tamatie en ui by warm rys en geur met peper.
Vars kruie soos pietersielie, koljander, grasuie of basiliekruid kan ook bygevoeg word. Soveel soos jy wil.

Roer elke dag iets anders by

Dag 1: 1 groen of rooi soetrissie, gekap (kan gerooster wees)

Dag 2: 2 koppies gaar aspersies of sampioene (nie gebliktes nie!)

Dag 3: 1 blikkie fyn tuna, gedreineer

Dag 4: vars pynappel, in blokkies gekap

Dag 5: 1 koppie geelwortels, in blokkies gekap en gestoom tot net gaar. As jy van 'n byt hou, kan jy 'n klein, ontpitte brandrissie fynkap en byroer.

Dag 6: groen groente soos spinasie, brokkoli, kool of preie, gekook of gestoom tot net gaar, maar ferm

Dag 7: 2 koppies fyn gaar hoender (want dis Sondag)

Eet dit warm of koud, net wanneer jy wil, soveel jy wil. Maar leer om na jou lyf te luister, mens eet net wanneer jy honger is.

As jy dors is, drink water of swart tee.

Moenie langer as 2 weke só eet nie.