Vroue strewe na die perfekte wenkbroue, en die nuutste gier is haarverlengings vir jou wenkbroue. Voller wenkbroue wat natuurlik lyk, nie te veel gepluk is of 'n oordrewe boog het nie, is glo die ideaal. 

Teenoor micro-blading skep wenkbrou-verlengings dimensie, volume en lyk meer natuurlik. Aangesien dit slegs 'n paar weke hou, is dit ideaal vir diegene wat nie 'n permanente oplossing soek nie. 

Talle vroue sukkel met dun, yl wenkbroue. Ongelukkig is wenkbrou-verlengings nog nie beskikbaar in Suid-Afrika nie. Yl wenkbroue hoef egter nie jou voorland te wees nie, daar is wel produkte wat kan help.

Hoe werk verlengings?

Eerstens sal die skoonheidsterapeut jou wenkbrouhare pluk om die vorm wat by jou gesig pas, te kry. Daarna word jou wenkbroue met 'n oogpotlood omlyn, om as 'n gids te dien vir die verlengings. Die verlengings word met 'n spesiale kleefmiddel op jou bestaande wenkbrouhare se wortels aangewend. Die verlengingshaartjies word een vir een met 'n haartangetjie in die kleefmiddel gedoop en dan langsaan 'n natuurlike haarwortel geplaas. Dit skep 'n natuurlike voorkoms, die verlengingshaartjies voel selfs soos natuurlike hare. Daar is verskillende skakerings, haardiktes en -tipes of van te kies. 

Die beste is dat selfs chemo-pasiënte wenkbrou-verlengings kan kry. Dit word dan direk op die vel aangewend. 

FOTO Instagram / Envious Lashes

Hoe lank hou dit?

As die wenkbrou-verlengings teenaan die haarwortels geplaas word, hou dit vir so 'n paar weke. As dit direk bo-op jou vel geplaas word, sal dit nie langer as twee weke hou nie. 

Onthou ...

Vermy dit om aan die verlengings te vat, selfs wanneer jy jou gesig was, aangesien dit die haartjies makliker sal laat uitval. Diegene met 'n olierige vel se verlengings sal ook minder lank hou. 

FOTO Instagram / Envious Lashes

Probeer dié produkte: 

Benefit 3D Brows (R375). By Edgars Beauty

M.A.C Shape + Shade Brow Tint (R305)

GOSH Brow Sculpting Fibre Gel (R157). By Edgars Beauty

Givenchy Mr Brow Groom (R430). By Edgars Beauty

Black|Up Perfect Eyebrows (R290). By Edgars Beauty

Bronne: www.allure.com, www.elle.com