RETINOL

BESTE VIR TEENVEROUDERING

WAT IS DIT?

Vra enige velsorgkenner oor hul gunsteling-velsorgbestanddele en retinol is byna altyd bo-aan hul lys. Dis geen verrassing nie. Dié suiwer vorm van vitamien A het ’n magdom voordele vir jou vel en navorsing het bevind dis een van die effektiefste bestanddele teen vroeë veroudering weens sonblootstelling.

HOE WERK DIT?

Retinol kommunikeer met jou vel se DNS waar dit onder meer die vervaardiging van nuwe selle aanhits en keer dat kollageen afgebreek word. Dit behandel ook donker vlekke, aknee, ’n onegalige veltekstuur, plooie en fyn lyntjies. “Ek glo enige persoon, jonk en oud, wat sonskade op hul vel opgedoen het, behoort ’n vorm van retinol te gebruik,” sê dr. Ian Webster, ’n spesialis-dermatoloog op Somerset-Wes en medestigter van die aanlyn velsorgwinkel Dermastore.

OM TE WEET

Die meeste retinolprodukte is in ’n serum te kry. Omdat dit baie aktief is, kan dit in die begin jou vel effens rooi en droog laat voel. Begin deur ’n produk met ’n lae konsentrasie retinol eers net twee of drie keer per week saans te gebruik. Sodra jou vel gewoond is daaraan, kan jy na hoër konsentrasies oorslaan en die aantal aanwendings vermeerder. Vermy retinol terwyl jy swanger is of borsvoed.

ONTHOU
’n Goeie breëspektrumsonskerm met ’n SBF van minstens 30 is steeds onontbeerlik in jou daaglikse velsorgroetine. Dit bly jou beste wapen teen velveroudering weens UV- en infrarooiblootstelling.

GLIKOLSUUR

BESTE VIR ’N STRALENDE VEL

WAT IS DIT?

’n Alfahidroksisuur (AHA) afkomstig van suikerriet. Dié suur word al lank in professionele chemiese afskilferingsbehandelings gebruik, maar is die laaste paar jaar ook gewild in tuissorgprodukte. Dit het die kleinste molekule van al die AHA’s en penetreer dus jou vel vinniger en dieper.

WAT DOEN DIT?

Glikolsuur skilfer jou vel doeltreffend af deur die “gom” tussen die dooie selle op jou veloppervlak op te los sodat dié selle makliker verwyder word. Dit sorg vir ’n gladder veltekstuur, verlig oppervlakkige pigmentasie en gee jou vel ’n gesonde glans. Omdat glikolsuur dieper penetreer, het dit ook die vermoë om kollageenvervaardiging te stimuleer. Jou ander velsorgprodukte word ook beter geabsorbeer.

OM TE WEET

Begin met ’n reiniger of verfrisser wat ’n laer konsentrasie glikolsuur bevat. Probeer daarna ’n afskilferingsproduk met ’n hoër konsentrasie. Moet nooit glikolsuur en retinol saam gebruik nie en vermy glikolsuur as jy geneig is tot ’n sensitiewe vel.

Beautiful redhead woman
FOTO Getty Images / Gallo Images

NIASIENAMIED

BESTE VIR ’N SENSITIEWE VEL

WAT IS DIT?

Niasienamied, ook bekend as vitamien B3, is ’n kragtige antioksidant en ’n gunstelingbestanddeel in produkte wat meer as een velsorgkwessie op ’n slag behandel, sê Unine van Rooyen, plaaslike opleier van die velsorghuis Dermalogica. Dit maak dit ’n staatmaker as jy ’n besige skedule het en nie noodwendig ’n klomp produkte in jou velsorgroetine wil hê nie.

HOE WERK DIT?

Niasienamied hou die velwand sterk en gesond omdat dit die vervaardiging van seramied aanwakker. Dit hidreer jou vel, beveg vry radikale en verbeter inflammasie, rooiheid en ’n onegalige velkleur.

OM TE WEET

Danksy niasienamied se uitstekende anti-inflammatoriese eienskappe is dit veral geskik vir mense met psoriase, rosacea of ’n reaktiewe vel. Dis ’n goeie bestanddeel om saam met retinol te gebruik.

ASELAÏENSUUR

BESTE VIR AKNEE EN MELASMA

WAT IS DIT?

Dit word natuurlik in koring, rog en gort gevind. Dié suur is nog relatief onbekend in velsorgprodukte, maar beslis een om voor op die uitkyk te wees omdat dit meer as een effek in die vel het, sê dr. Webster.

WAT DOEN DIT?

Dié suur geniet al hoe meer aandag danksy sy vermoë om aknee en die vorming van hiperpigmentasie doeltreffend te beveg. Dit voorkom puisies deur inflammasie op die veloppervlak te verbeter en vernietig bakterieë wat aknee veroorsaak. En omdat dit tirosinase, die ensiem wat melanien vervaardig, blokkeer, is dit ’n goeie behandeling teen melasma (pigmentasie weens hormoonveranderings) en die klein bruin vlekkies wat dikwels agterbly ná erge aknee.

OM TE WEET

Aselaïensuur het byna geen newe-effekte nie en kan saam met die meeste ander bestanddele gebruik word. Dit maak dit maklik om hierdie suur by jou roetine te voeg.

PEPTIEDE

BESTE VIR FERMHEID, LYNTJIES EN PLOOIE

WAT IS DIT?

Peptiede is kort kettings van aminosure wat natuurlik in jou liggaam voorkom. Dit vorm die boustene van die proteïene in ons lyf, insluitend kollageen en elastien.

HOE WERK DIT?

Peptiede wat aan die vel gelewer word, het die vermoë om spesifieke velsorgfunksies aan selle te kommunikeer, verduidelik Unine. So kan een tipe peptiede bv. hidrasie verbeter en ’n ander sensitiwiteit. In die meeste velsorgprodukte stimuleer peptiede jou vel se fibroblaste om kollageen en elastien te vervaardig sodat jou vel fermer, sterker, plomper en gladder is, sê dr. Webster. Boonop veroorsaak peptiede geen irritasie in die vel nie en is daarom ’n gewilde bestanddeel om lyntjies en plooie rondom die oë te behandel.

OM TE WEET

Peptiede word selde op hul eie in produkformulerings gebruik. ’n Produk wat ’n verskeidenheid peptiede asook antioksidante en bevogtigende bestanddele bevat, sal die meeste voordele vir jou vel inhou. Wees op die uitkyk vir woorde soos “oligopeptide”, “dipeptide” en “pentapeptide” op die bestanddelelys.

ONTHOU

Jy moet gewoonlik ’n produk vir minstens een tot twee maande gebruik voor jy resultate begin sien, volgens Unine.

PRODUKTE

1. As jy nog nooit voorheen retinol op jou vel gebruik het nie, probeer die nagroom SkinCeuticals Retinol 0.3 (R1 335). By uitsoek-dokterspreekkamers of dermastore.co.za. Besoek skinceuticals-za.com

2. Gebruik dié afskilferingslappies geweek in glikolsuur saans ná reiniging – L’Oréal Paris Revitalift Bright Reveal Brightening Peel Pads (R350).

3. Gebruik die pHformula Vita Mask B3 (R709) om ’n droë, rooi en geïrriteerde vel te kalmeer. By uitsoeksalonne

4. Dié soliede reiniger met aselaïensuur help om pigmentasievlekke te verlig en kan daagliks gebruik word – PCA Skin Pigment Bar (R875). By dermastore.co.za

5. Buiten peptiede bevat dié dubbele formule van Dermalogica Phyto-Nature Firming Serum (R2 599) drie kragtige plantekstrakte wat beskerm teen buitefaktore wat jou vel verouder.

Bykomende bronne: paulaschoice.com, self.com, dermastore.co.za