Vee, skakeer, tik. Grimering is ’n stukkie kuns en vir dié tegnieke het jy die regte borsels nodig. Hiér is jou volledige SARIE-gids vir grimeerborsels. Ons kies vir jou die beste ...

Moet-hê grimeerborsels:

Dié grimeerborsels is ’n moet-hê vir enige grimeersakkie.

Blosserborsel

Kies een met ’n skuins hoek omdat jy dit ook vir verbronser en verligter kan gebruik.

Poeierborsel

As jy gereeld ’n los poeiergrimering gebruik, belê in ’n poeierborsel met ’n groot kop. Dit help dat die poeier meer eweredig aanwend.

Oogskadu-borsels

’n Wye verskeidenheid oogskadu-borsels is beskikbaar, maar as jy net een moet kies, kry een met ’n plat punt. Hierdie borsel werk goed vir elke deel van jou oog en is ook ideaal vir romerige oogskadu.


Ander grimeerborsels:

Dié grimeerborsels is dalk nie die eerste borsels wat jy sal kies nie, maar as jy ernstig is oor grimering is dit ’n moet.

Onderlaagborsel

As jy hou van volledige bedekking is ’n plat onderlaagborsel nodig. Dit help om jou vel goed te bedek sonder dat dit onnatuurlik lyk.

Waaierborsel

Gebruik dié borsel om grimeerpoeier aan te wend. Deur dit in vinnige sirkelbewegings oor jou gesig te beweeg nadat jy onderlaag aangewend het, gaan dit lyk asof jou vel ge-airbrush is.

Verbloemerborsel

’n Plat verbloemerborsel maak dit maklik om die produk glad en egalig aan te wend, terwyl die dun punt by die moeilike dele bykom, soos rondom jou neusvleuels.

Oogomlynborsel

Die borsel maak dit maklik om omlyner perfek aan te wend, veral jel-omlyner. Jy kan die borsel ook gebruik om oogpotlood te skakeer (smudge) en jou wenkbroue in te kleur.

Lipkwassie

Skaf hierdie borsel aan as jy gereeld donkerder lipstiffie skakerings soos rooi en bessie dra. Dis net makliker om diep kleure netjies en perfek met ’n kwassie aan te wend.

Probeer dié borsels:

1. NYX Professional Makeup Pro Brush Collection Powder Brush (R300)

By Clicks

2. The Body Shop Eyeshadow Brush (R112)

3. Sorbet Fresh-Faced Raring To Go Get Cheeky Angled Blush Brush (R120)

4. essence Eye Blender Brush (R35)

5. Real Techniques Flawless Base Set (R469)