NATANIËL

Hou jy van rooi lipstiffie?
Net soms. Dit val in dieselfde kategorie as vals wimpers, swart oogskadu, bont naels, stilettos
of baie lang hare – dis óf fantasties óf afgryslik. Daar is nie ’n middeweg nie.

Dink jy enige vrou kan dit dra?
Glad nie. Dit hang af van ouderdom (ja, daar kom ’n dag!), persoonlikheid, die grootte en vorm van die mond, die vrou se lengte en die vaardigheid waarmee dit aangewend word. Soos enigiets wat ’n sterk indruk maak, het dit ’n goeie oog nodig om regtig te werk. Daar is ’n romantiese idee dat rooi lipstiffie onder enige omstandighede iemand spesiaal of sexy maak. Dis nie waar nie, die gevolge is dikwels tragies.

CHRIS CHAMELEON

Hou mans van rooi lipstiffie?
Hierdie man wel. Ek hou baie van ’n bietjie lipstiffie.

Wanneer trek ’n rooi mond jou aan?
As die kop agter daardie mond goed aangeskroef en die hart daaronder teer is.