Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Krieket
KYK: Marnus praat steeds Afrikaans

Laa-boo-shayne, soos Champagne.

Só verduidelik die Suid-Afrikaans-gebore Australiese krieketspeler Marnus Labuschagne die uitspraak van sy van op ’n YouTube-video.

“Goed, maar maak gou almal deurmekaar – hoe klink die Suid-Afrikaanse uitspraak?” vra die Australiese onderhoudvoerder.

Labuschagne lag en probeer eers teëstribbel.

“Die Suid-Afrikaanse uitspraak is La-boe-skagh-nie.” Hy vorm die growwe g-klank met ’n geoliede Afrikaanse mond, so presies dat dit klink of hy aan ’n stuk melktert stik.

“Maar ja, moenie daardie uitspraak probeer nie...” skerts hy.

Marnus Labuschagne word deur sy Aussie-spanmaats gelukgewens ná sy eerste toetspaaltjie. Foto: Getty Images
Marnus Labuschagne word deur sy kaptein, Tim Paine, gelukgewens ná sy eerste toetspaaltjie vir Australië. Foto: Getty Images

Labuschagne, ’n middelordekolwer en deeltydse bybreekbouler, het die afgelope week die tweede Suid-Afrikaner naas Kepler Wessels geword om vir Australië toetskrieket te speel.

Met die kolf het dit nie te watwonders gegaan in sy toetsbuiging teen Pakistan in Dubai nie. Hy moes met ’n nulletjie en ’n beurt van 13 tevrede wees.

Hy het wel die belangrike paaltjie van Asad Shafiq (80) in die eerste beurt platgetrek. Dié toets het onbeslis geëindig.

Labuschagne (24) het in Klerksdorp grootgeword en Suid-Afrika in 2004 verlaat, toe hy tien jaar oud was.

“Hulle het Suid-Afrika verlaat omdat sy pa (André) werk gekry het in Australië,” vertel Martin Labuschagne, Marnus se oom en André se broer.

André het in die mynbedryf gaan werk in Brisbane.

Martin lag as ’n mens hom pols oor hoe sy nefie nou hul van uitspreek.

“Die Aussies sukkel vreeslik om dit te sê, so hulle moes maar aan ’n plan dink dat die Aussies dit kan uitspreek,” sê hy.

Hy verseker egter dat Afrikaans steeds Marnus se huistaal is.

“Hy praat Afrikaans soos ek en jy, sy pa is baie op Afrikaans ingestel.”

Martin se vrou, Lucette, sê al wat sy van krieket weet, is dat sy nou vir die eerste keer die tellings moet dophou. Sy sê ook hoewel Marnus vlot Afrikaans praat, hy ordentlik genoeg is om dít nie te doen as daar mense teenwoordig is wat nie Afrikaans magtig is nie.

“Hy praat maar Engels as sy vroutjie (Rebekah) en ander Aussies by is, hy het goeie maniere,” sê Lucette.

Hy was baie passievol oor die spel en almal het sy talent al van jongs af raakgesien. Hy sou vir vyf dae vasgenael voor die televisie gesit het met toetse.
Martin Labuchagne

Volgens Martin het Marnus vroeg reeds uitstaande kriekettalent gewys.

“Hy was baie passievol oor die spel en almal het sy talent al van jongs af raakgesien. Hy sou vir vyf dae vasgenael voor die televisie gesit het met toetse. Ons het altyd geweet hy kan dit maak.”

Frans Marx, Labuschagne se rugby- en krieketafrigter by die Laerskool Driefonteine in Stilfontein, onthou hom ook as ’n uitstekende sportman.

“Hy was uiters sportief, van o.9-ouderdom af het hy reeds vir die o.10-span krieket gespeel. Ek onthou hom veral as ’n uitmuntende rugbyspeler.

“Ek moet sê, dit voel baie lekker om te weet ’n internasionale krieketspeler is al deur my hande.”

Marnus het in onderhoude vertel hoe hy gesukkel het om Engels te praat toe hy net in Australië aangekom het. Hy kon nie die aksent uitmaak nie en moes die taal vinnig aanleer.

Hy het egter vroeg reeds op die sportveld beïndruk.

Hy het Queensland in alle ouderdomsgroepe verteenwoordig en die o.19-span aangevoer, voordat hy sy eersterangse buiging as ’n 20-jarige vir Queensland gemaak het.

Marnus Labuschagne het slegs die tweede Suid-Afrikaner naas Kepler Wessels geword om Australië in toetskrieket te verteenwoordig. Hy het sy buiging in die eerste toets tussen Australië en Pakistan in Dubai gemaak. Dié toets het onbeslis geëindig. Foto: Getty Images

Marnus het aanvanklik die verbeelding van die krieketwêreld in 2014 aangegryp toe hy as ’n plaasvervanger-veldwerker in die Aussies se toets teen Indië in Brisbane ’n uitstekende vangkans in die slagysterposisie benut het.

Ná dié vangkans, het hy verduidelik hoe hy en sy kamermaat mielies op hul kombuistafel met ’n mes kap en dan duik om die afgekapte deel van die mielie met die een hand te vang – so asof hulle vangkanse in die slagysterposisie nuttig.

Hy het vroeër vanjaar ook vir die Australiese A-span gespeel – teen onder meer Suid-Afrika.

“Toe hy vir die A-span speel, het ons daarvan begin droom dat hy vir die Aussies kan speel,” vertel Martin.

Labuschagne het onlangs in ’n onderhoud vertel hoe die Afrikaanssprekende spelers in die Suid-Afrikaanse A-span gemoedelik die gek met hom geskeer het.

“Hulle het die heeltyd gesê hulle kan nie juis in Afrikaans praat nie, want ek sal verstaan. Hulle kan ook nie planne in Engels maak nie, want dié verstaan ons uiteraard ook,” sê Labuschagne.

Hoewel Labuschagne verheug is dat hy nou Afrikaans en Engels vlot kan praat, lê sy prioriteite by sy aangenome land.

Dit is ’n reuse-eer, voorreg en verantwoordelikheid om my land te verteenwoordig.
Marnus Labuschagne

“Dit is ’n reuse-eer, voorreg en verantwoordelikheid om my land te verteenwoordig.”

Of dit nou Laa-boo-shayne soos vonkelwyn of La-boe-skagh-nie alla kragtie is, een ding staan soos ’n paal bo water: sy Suid-Afrikaanse familie is baie trots op hom.

“As hy ooit teen die Proteas speel, sal ek maar vir Marnus ondersteun. Ek sal maar vir hom skree... én vir Suid-Afrika,” lag Martin

Meer oor:  Suid-Afrika  |  Australie  |  Krieket  |  Afrikaans
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.