Ben Stokes sal ná ’n blaaskans weer vir Engeland diens doen in die komende toetsreeks teen Indië. Foto: Getty Images
Ben Stokes, Jofra Archer en Rory Burns is terug in Engeland se krieketgroep vir die eerste twee toetse in die komende toetsreeks van vier teen Indië.
Stokes en Archer is ruskans gegee vir die reeks teen Sri Lanka, terwyl Burns sy vrou bygestaan het met die geboorte van hul eersteling.
Jonny Bairstow, Sam Curran en Mark Wood kry nou ruskans en sal die eerste twee toetse misloop.
Die eerste toets begin op 5 Februarie in Chennai aan Indië se ooskus.
Ollie Pope kan hom by die groep aansluit sodra hy fiks verklaar word. Hy het in September teen Pakistan ’n skouerbesering opgedoen.
Engeland gaan ná die vier toetse ook vyf T20-wedstryde en drie eendagwedsryde teen Indië speel.
• Engeland se toetsgroep vir die eerste twee toetse: Joe Root (k), Jofra Archer, Moeen Ali, James Anderson, Dom Bess, Stuart Broad, Rory Burns, Jos Buttler, Zak Crawley, Ben Foakes, Dan Lawrence, Jack Leach, Dom Sibley, Ben Stokes, Olly Stone en Chris Woakes. – Sportredaksie
