Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
SuperRugby
Al kry Leeus pak, is Swys trots

Al moes hy hier uit Suid-Afrika op televisie kyk hoe sy span met 36-10 deur die Crusaders verslaan word in hul Superrugby-kragmeting, was die durf wat die welpies van die Leeus gewys het, vir Swys de Bruin ’n riem onder die hart.

“Die ouens het baie guts gewys en aangehou tot die einde. Dit was ’n goeie leerskool vir die jong manne gewees.

Die Leeus het aanvanklik goed verdedig teen die Crusaders, maar die damwal het in die tweede helfte van dié kragmeting in Christchurch gebreek. Foto: Getty Images

“Ons sal aanhou werk en hergroepeer vir hierdie laaste deel van die Super-seisoen,” het De Bruin gesê.

Hy is verlede week weens mediese redes terug na Suid-Afrika. Stres is by hom gediagnoseer en sedert sy terugkeer, kry De Bruin professionele hulp vir hierdie toestand.

“Ons het twee sagte drieë in die eerste helfte afgestaan en toe weer twee vroeg in die tweede helfte. Tog het die ouens enduit bly veg en nooit tou opgegooi nie,” sê hy.

Ivan van Rooyen, wat in De Bruin se afwesigheid in Nieu-Seeland die leisels geneem het vir die kragmetings met die Chiefs en die Crusaders, voel dit sal van groot belang wees as die jongelinge in die span iets geleer het uit hierdie nederlaag in Christchurch.

“Ons het vanaand (Vrydag) ’n 21-jarige en ’n 22-jarige in ons voorry gehad wat teen basies die All Blacks te staan gekom het. As hulle iets wys geword het en ervaring kon opdoen, is dit vir my baie opwindend en dien ’n wedstryd soos hierdie beslis ’n doel,” vertel Van Rooyen. Hy het verwys na die jong plaasvervangers, Nathan McBeth en Jan-Henning Campher.

“Dit was ’n moeilike aand vir ons en hierdie is ook ’n baie moeilike plek om te kom speel. Dit is die soort van span (Crusaders) wat as jy foute teen hulle maak, laat hulle jou daarvoor boet.

“Ek is ook die tipe afrigter wat dinge vierkant in die oë kyk en konfronteer en ek wil leer uit sulke ervarings,” sê hy.

Die agtsteman en kaptein, Kwagga Smith, wat die leisels by die beseerde Warren Whiteley oorgeneem het vir dié wedstryd, voel hulle het ’n aantal kanse gehad, maar dit nie benut nie.

“Ons moet leer om meer te fokus. Hulle het sake in die skrums ontwrig en dit moeilik daar vir ons gemaak. Daardie afdeling van die spel was eintlik morsig,” reken Smith, wat ’n besielende vertoning gelewer het en die Leeus se uitstaande speler was.

Danksy die verrassende sege van verlede Vrydag oor die Chiefs, keer die Leeus darem nie met leë hande terug huis toe nie en het hulle vier uit ’n moontlike 15 ligapunte gekry in Australasië.

Hulle het volgende week ’n loslootjie, voordat die Waratahs uit Sydney die daaropvolgende Saterdag (11 Mei) op Ellispark gepak word.

Puntemakers:

Crusaders 36 (17): Drieë: Braydon Ennor, Sevu Reece (2), George Bridge (2). Doelskoppe: Richie Mo’unga (4). Strafdoel: Mo’unga.

Leeus 10 (3): Drie: Ruan Combrinck. Doelskop: Elton Jantjies. Strafdoel: Jantjies.

Meer oor:  Leeus  |  Crusaders  |  Superrugby
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.